• Search Coorg Media

ಕೊರೋನಾ ಸಂಕಷ್ಟ: ಉಚಿತ ಪ್ರವೇಶಾತಿಗೆ ಮುಂದಾದ ಮಡಿಕೇರಿ ಕ್ರೆಸೆಂಟ್ ಶಾಲೆ

ಕೊರೋನಾ ಸಂಕಷ್ಟ: ಉಚಿತ ಪ್ರವೇಶಾತಿಗೆ ಮುಂದಾದ ಮಡಿಕೇರಿ ಕ್ರೆಸೆಂಟ್ ಶಾಲೆ

ಮಡಿಕೇರಿ: ಕೊರೋನಾ ಲಾಕ್‌ಡೌನ್‌ನಿಂದಾಗಿ ಜಿಲ್ಲೆಯ ಜನ ಆರ್ಥಿಕ ಸಂಕಷ್ಟವನ್ನು ಎದುರಿಸುತ್ತಿರುವುದರಿಂದ ನಗರದ ಕ್ರೆಸೆಂಟ್ ಶಾಲೆಯಲ್ಲಿ ಮುಂದಿನ ಶೈಕ್ಷಣಿಕ ವರ್ಷದಲ್ಲಿ ಎಲ್‌ಕೆಜಿ ವಿದ್ಯಾರ್ಥಿಗಳಿಗೆ ಶುಲ್ಕ ರಹಿತವಾಗಿ ಸಂಪೂರ್ಣ ಉಚಿತ ಪ್ರವೇಶಾತಿಯನ್ನು ನೀಡಲು ನಿರ್ಧರಿಸಲಾಗಿದೆ ಎಂದು ಶಿಕ್ಷಣ ಸಂಸ್ಥೆಯ ಅಧ್ಯಕ್ಷ ನಿಜಾಮುದ್ದೀನ್ ಸಿದ್ದಿಕ್ ತಿಳಿಸಿದ್ದಾರೆ.

ಕಳೆದ ಎರಡು ವರ್ಷಗಳಿಂದ ಕೊಡಗು ಜಿಲ್ಲೆ ಪ್ರಾಕೃತಿಕ ವಿಕೋಪಗಳಿಂದ ತತ್ತರಿಸಿ ಹೋಗಿದ್ದು, ಸ್ವಲ್ಪ ಚೇತರಿಕೆ ಕಂಡುಕೊಳ್ಳುವ ಸಂದರ್ಭ ಕೊರೋನಾ ಛಾಯೆ ನಮ್ಮ ದೇಶವನ್ನು ಆವರಿಸಿ ಲಾಕ್‌ಡೌನ್‌ನಲ್ಲಿ ಇರುವಂತಹ ಪರಿಸ್ಥಿತಿ ಬಂದೊದಗಿದೆ. ಇದರಿಂದ ಜಿಲ್ಲೆಯ ಜನ ಕೂಡ ಕಠಿಣ ಆರ್ಥಿಕ ದುಸ್ಥಿತಿಯನ್ನು ಎದುರಿಸುತ್ತಿದ್ದಾರೆ. ಇದನ್ನು ಮನಗಂಡು ಶಾಲಾ ಆಡಳಿತ ಮಂಡಳಿ ಮುಂದಿನ ಶೈಕ್ಷಣಿಕ ವರ್ಷದಲ್ಲಿ ಎಲ್‌ಕೆಜಿ ವಿದ್ಯಾರ್ಥಿಗಳನ್ನು ಉಚಿತವಾಗಿ ದಾಖಲಿಸಿಕೊಳ್ಳಲು ನಿರ್ಧರಿಸಿರುವುದಾಗಿ ಅವರು ಹೇಳಿದ್ದಾರೆ.

ಅಲ್ಲದೆ ಇತರ ವಿದ್ಯಾರ್ಥಿಗಳ ಪ್ರೇವೇಶಾತಿ ಶುಲ್ಕದಲ್ಲಿ ಶೇ.೫೦ ರಷ್ಟು ಕಡಿತವನ್ನು ಮಾಡಲಾಗುವುದು ಎಂದು ಹೇಳಿದ್ದಾರೆ. ಕ್ರೆಸೆಂಟ್ ಶಾಲಾ ಅಧ್ಯಾಪಕರುಗಳು ತಮ್ಮ ವೇತನದಲ್ಲಿ ಶೇ.೨೫ ರಷ್ಟು ಕಡಿತಗೊಳಿಸಿ ಸೇವೆ ಸಲ್ಲಿಸುವುದಾಗಿ ಸ್ವಯಂ ನಿರ್ಣಯ ಕೈಗೊಂಡಿದ್ದು, ಇದು ಸ್ವಾಗತಾರ್ಹ ಕ್ರಮವಾಗಿದೆ.

ಕೇಂದ್ರೀಯ ಮಾದರಿ ಪಠ್ಯಕ್ರಮವನ್ನು ಅನುಸರಿಸಿ ಶಿಕ್ಷಣ ರಂಗದಲ್ಲಿ ಉತ್ಕೃಷ್ಟ ಸೇವೆಯನ್ನು ಸಲ್ಲಿಸುತ್ತಾ, ಅನುಭವಿ ಅಧ್ಯಾಪಕರುಗಳ ಕಠಿಣ ಪರಿಶ್ರಮ ಮತ್ತು ಶಾಲಾ ಆಡಳಿತ ಮಂಡಳಿಯ ನಿಸ್ವಾರ್ಥ ಸೇವೆಯಿಂದ ಶಾಲೆ ೨೮ ವರ್ಷಗಳನ್ನು ಪೂರೈಸಿದೆ. ಪಾಠ, ಪ್ರವಚನದ ಜೊತೆಗೆ ವಿಜ್ಞಾನ, ಕಲೆ, ಕ್ರೀಡೆ ಹಾಗೂ ಇತರ ಚಟುವಟಿಕೆಗಳ ಮೂಲಕ ವಿದ್ಯಾರ್ಥಿಗಳ ಭವ್ಯ ಭವಿಷ್ಯದ ಬಗ್ಗೆ ಕಾಳಜಿ ಹೊಂದಿದೆ. ಅಲ್ಲದೆ ಇಲ್ಲಿಯ ವಿದ್ಯಾರ್ಥಿಗಳು ಸಮಾಜದ ಮುಖ್ಯ ವಾಹಿನಿಯಲ್ಲಿ ಬೆರೆತು ಅನೇಕ ಗೌರವಯುತ ಹುದ್ದೆಗಳನ್ನು ಅಲಂಕರಿಸಿ ಸಮಾಜಕ್ಕೆ ತಮ್ಮದೇ ಆದ ರೀತಿಯ ಕಾಣಿಕೆಯನ್ನು ನೀಡುತ್ತಲಿರುವುದು ಶಾಲೆಯ ಹಿರಿಮೆ ಎಂದು ನಿಜಾಮುದ್ದೀನ್ ಸಿದ್ದಿಕ್ ತಿಳಿಸಿದ್ದಾರೆ.

ಕ್ರೆಸೆಂಟ್ ಶಾಲೆಯ ಬಗ್ಗೆ:

1992ರಲ್ಲಿ ಕೇವಲ ಬೆರಳೆಣಿಕೆ ವಿದ್ಯಾರ್ಥಿಗಳಿಂದ ಪ್ರಾರಂಭಗೊಂಡ ಕ್ರೆಸೆಂಟ್‌ ಶಾಲೆಯು ಎಲ್.ಕೆ.ಜಿ. ಯಿಂದ 10ನೇ ತರಗತಿಯವರಗಿನ ವಿದ್ಯಾರ್ಥಿಗಳಿಗೆ ವ್ಯಾಸಂಗಕ್ಕೆ ವ್ಯವಸ್ಥೆಯನ್ನು ಮಾಡಿ ಕೊಟ್ಟಿದೆ.

ಆಂಗ್ಲ ಮಾಧ್ಯಮದ ಜೊತೆಗೆ ಸಿ.ಬಿ.ಎಸ್.ಇ. ಬೋಧನಾ ವ್ಯವಸ್ಥೆಯನ್ನು ಒಳಗೊಂಡಿದ್ದು, ” ನೂರುಲ್‌ ಇಸ್ಲಾಂ ಎಜುಕೇಷನ್‌ ಸೊಸೈಟಿ ರಿ)” ಹೆಸರಿನಲ್ಲಿ ಕಾರ್ಯನಿರ್ವಹಿಸುತ್ತಿದೆ.

ಮಡಿಕೇರಿಯ ಸಮೀಪವಿರುವ ಹೆಬ್ಬೇಟ್ಟಗೇರಿ ಗ್ರಾಮದ ಅಬಿಪಾಲ್ಸ್‌ಗೆ ಹೋಗುವ ಮಾರ್ಗ ಮತ್ತು ಕೊಡಗು ವೈದ್ಯಕೀಯ ವಿಜ್ಞಾನ ಸಂಸ್ಥೆಯ (ಮೆಡಿಕಲ್‌ ಕಾಲೇಜ್)‌ ಪಕ್ಕ 25 ಏಕರೆ ಪ್ರದೇಶವನ್ನು ಖರೀದಿಸಿ ದೊಡ್ಡ ಕ್ಯಾಂಪಸ್‌ ಮಾಡುವ ಯೋಜನೆಯಲ್ಲಿ ತೊಡಗಿಸಿಕೊಂಡಿದೆ.

ಕ್ರೆಸೆಂಟ್‌ ಶಾಲೆಯು ಮಡಿಕೇರಿಯ ಮಹದೇವಪೇಟೆಯ ಚೌಡೇಶ್ವರಿ ದೇವಾಲಯ ಹಾಗೂ ಬಸವೇಶ್ವರ ದೇವಾಲಯದ ನಡುವೆ 1992 ರಿಂದ ತನ್ನ ವಿದ್ಯಾದಾನವನ್ನು ಸಮಾಜಕ್ಕೆ ನೀಡುತ್ತಾ ಬರುತ್ತಿದ್ದು, ಮಡಿಕೇರಿಯ ಕ್ರೆಸೆಂಟ್‌ ಶಾಲೆಯಲ್ಲಿ ವ್ಯಾಸಂಗ ಮಾಡಿದ ಹಲವಾರು ವಿದ್ಯಾರ್ಥಿಗಳು ಉನ್ನತ್ತ ವ್ಯಾಸಂಗ, ಉನ್ನತ್ತ ಹುದ್ದೆಗಳನ್ನು ಅಲಂಕರಿಸಿ ಶಾಲೆಗೆ ಕೀರ್ತಿ ತಂದುಕೊಟ್ಟಿದ್ದಾರೆ.

ಕ್ರೆಸೆಂಟ್‌ ಶಾಲೆಯ ಸೇವಾಕಾರ್ಯಗಳು:

2018ರಲ್ಲಿ ಮಹಾಮಳೆಯಿಂದ ಕೊಡಗು ಜಿಲ್ಲೆಯಲ್ಲಿ ಸಂಭವಿಸಿದ ಪ್ರಾಕೃತಿಕ ವಿಕೋಪದ ಸಂದರ್ಭ ಸಂಕಷ್ಟಕ್ಕೆ ಸಿಲುಕಿದವರ ನೆರವಿಗೆ ಧರ್ಮಾತೀತ ಮತ್ತು ಜಾತ್ಯತೀತವಾಗಿ ನಿಸ್ವಾರ್ಥ ಸೇವೆ ಸಲ್ಲಿಸಿದ ಕ್ರೆಸೆಂಟ್ ಶಾಲೆಯು, ಶಾಲಾ ಆವರಣದಲ್ಲಿ ಹ್ಯುಮ್ಯಾನಿಟೇರಿಯನ್ ರಿಲೀಫ್ ಸೊಸೈಟಿ, ಜಮಾಅತೆ ಇಸ್ಲಾಮಿ ಹಿಂದ್ ಕೊಡಗು ರಿಲೀಫ್ ಸೆಲ್, ಪ್ರಬುದ್ಧ ನೌಕರರ ಒಕ್ಕೂಟ, ಕ್ರೆಸೆಂಟ್ ಶಾಲಾ ಆಡಳಿತ ಮಂಡಳಿಯ ಸಂಯುಕ್ತಾಶ್ರಯದಲ್ಲಿ ಸುಳ್ಯದ ಕೆ.ವಿ.ಜಿ. ವೈದ್ಯಕೀಯ ಮಹಾವಿದ್ಯಾಲಯದ ಸಹಕಾರದೊಂದಿಗೆ ಜಿಲ್ಲೆಯ ಸಂತ್ರಸ್ತರು ಹಾಗೂ ನಾಗರಿಕರಿಗಾಗಿ ‘ಉಚಿತ ವೈದ್ಯಕೀಯ ಮಹಾಶಿಬಿರ’ ನಡೆಸಿತು.

2014ರಲ್ಲಿ ಮಡಿಕೇರಿಯಲ್ಲಿ ನಡೆದ ಅಖಿಲ ಭಾರತ ಕನ್ನಡ ಸಾಹಿತ್ಯ ಸಮ್ಮೇಳನ ಸಂದರ್ಭ ಕ್ರೆಸೆಂಟ್ ಶಾಲೆಯಲ್ಲಿ 400 ಮಂದಿಗೆ ಕನ್ನಡ ಸಾಹಿತ್ಯ ಸಮ್ಮೇಳನಕ್ಕೆ ಬರುವ ಸಾಹಿತ್ಯಾಸಕ್ತರಿಗೆ ಉತ್ತಮ ವಸತಿ ಸೌಕರ್ಯ ಕಲ್ಪಿಸಲು ವ್ಯವಸ್ಥೆ ಮಾಡಿಕೊಟ್ಟಿತು.

ಕ್ರೆಸೆಂಟ್ ಶಾಲೆ ಹಾಗೂ ಪಿ.ಪಿ.ಫೌಂಡೇಷನ್ ವತಿಯಿಂದ 2019ರ ಫೆ.9 ರಂದು ಎಸ್‍ಎಸ್‍ಎಲ್‍ಸಿ ವಿದ್ಯಾರ್ಥಿಗಳಿಗೆ ಪರೀಕ್ಷೆಯನ್ನು ಎದುರಿಸುವ ಬಗ್ಗೆ ಉಚಿತ ಶೈಕ್ಷಣಿಕ ಸಲಹಾ ಶಿಬಿರ ನಡೆಸಲ್ಪಟ್ಟಿತ್ತು.

ಕ್ರೆಸೆಂಟ್‌ ಶಾಲೆಯ ವಿದ್ಯಾರ್ಥಿಗಳ ಪ್ರತಿಜ್ಞೆ ಈ ರೀತಿ ಇದೆ:

ಭಾರತ ನನ್ನ ತಾಯಿನಾಡು,
ಎಲ್ಲಾ ಭಾರತೀಯರು ನನ್ನ ಸಹೋದರರು ಮತ್ತು ಸಹೋದರಿಯರು
ನಾನು ನನ್ನ ದೇಶವನ್ನು ಪ್ರೀತಿಸುತ್ತೇನೆ ಮತ್ತು ನನ್ನ ದೇಶದ ಶ್ರೀಮಂತ ಮತ್ತು ವಿವಿಧ ಪರಂಪರೆಯ ಬಗ್ಗೆ ಹೆಮ್ಮೆ ಪಡುತ್ತೇನೆ.
ನಾನು ಯಾವಾಗಲೂ ಅದಕ್ಕೋಸ್ಕರ ಶ್ರಮಿಸುತ್ತೇನೆ.
ನನ್ನ ಪೋಷಕರಿಗೆ, ಶಿಕ್ಷಕರಿಗೆ ಮತ್ತು ಎಲ್ಲಾ ಹಿರಿಯರಿಗೆ ಗೌರವಿಸುತ್ತೇನೆ ಮತ್ತು ಎಲ್ಲರೊಂದಿಗೆ ಸೌಜನ್ಯದಿಂದ ವರ್ತಿಸುತ್ತೇನೆ.
ನನ್ನ ದೇಶ ಮತ್ತು ಜನರಿಗೆ, ನನ್ನ ಬದ್ಧತೆಯ ವಾಗ್ದಾನ ಮಾಡುತ್ತೇನೆ.
ಅವರ ಯೋಗಕ್ಷೇಮದ ಮತ್ತು ಅಭ್ಯುದಯದಲ್ಲಿ ನನ್ನ ಸಂತೋಷ ನೆಲೆಸಿದೆ.

ಸಾಂಬಾರ ಬೆಳೆಗಳಲ್ಲಿ ಏಪ್ರಿಲ್-ಮೇ ತಿಂಗಳಲ್ಲಿ ಅನುಸರಿಸಬೇಕಾದ ಕೃಷಿ ಚಟುವಟಿಕೆಗಳು

ಸಾಂಬಾರ ಬೆಳೆಗಳಲ್ಲಿ ಏಪ್ರಿಲ್-ಮೇ ತಿಂಗಳಲ್ಲಿ ಅನುಸರಿಸಬೇಕಾದ ಕೃಷಿ ಚಟುವಟಿಕೆಗಳು

ಐಸಿಎಆರ್, ಭಾರತೀಯ ಸಂಬಾರ ಬೆಳೆಗಳ ಸಂಶೋಧನಾ ಸಂಸ್ಥೆ ಕಲ್ಲಿಕೋಟೆ ವತಿಯಿಂದ ಬಿಡುಗಡೆಯಾದ ಸಾಂಬಾರ ಬೆಳೆಗಳಲ್ಲಿ ಏಪ್ರಿಲ್-ಮೇ ತಿಂಗಳಲ್ಲಿ ಅನುಸರಿಸಬೇಕಾದ ಕೃಷಿ ಚಟುವಟಿಕೆಗಳ ವಿವರಗಳು ಈ ಕೆಳಗಿನಂತಿವೆ:

ಕರಿಮೆಣಸು ಬೆಳೆ ಉತ್ಪಾದನೆಗೆ ಸಂಬಂಧಿಸಿದಂತೆ, ನರ್ಸರಿ ನಿರ್ವಹಣೆ: ಸಸಿಮಡಿಗೆ ನಿಯಮಿತವಾಗಿ ನೀರಾವರಿ ಮಾಡಿ ಮತ್ತು ಸೂಕ್ಷ್ಮ ಪೋಷಕಾಂಶಗಳ ಮಿಶ್ರಣವನ್ನು ಸಿಂಪಡಿಸಿ. ತೋಟದಲ್ಲಿ ನೆಡಲು ಆರೋಗ್ಯಕರ, ಬೇರೂರಿದ ಸಸಿಗಳನ್ನು ಆರಿಸಿ ನೆಡಬೇಕು.

ತೋಟದ ನಿರ್ವಹಣೆ: ಬಳ್ಳಿಗಳಿಗೆ ಸಾಕಷ್ಡು ನೆರಳು ಮತ್ತು ಹಸಿಗೊಬ್ಬರವನ್ನು ಒದಗಿಸಿ., ಏಪ್ರಿಲ್ 2 ನೇ ವಾರದಿಮದ 10 ದಿನಗಳ ಮಧ್ಯಂತರದಲ್ಲಿ ಒಂದು ಬಳ್ಳಿಗೆ 30-40 ಲೀಟರ್ ನೀರನ್ನು ಒದಗಿಸಿ. ಹೆಚ್ಚಿನ ಸೂರ್ಯನ ಬೆಳಕು ಮತ್ತು ಬರ ತಪ್ಪಿಸಲು 100 ಲೀಟರ್ ನೀರಿನಲ್ಲಿ 2 ಕೆ.ಜಿ ಸುಣ್ಣ ಅಥವಾ 1 ಕೆ.ಜಿ ಕಾಯೋಲಿನ್ ಅನ್ನು ಸಿಂಪಡಿಸಿ. ಮಳೆ ಬಂದ ನಂತರ ಹಿಂದಿನ ತಿಂಗಳಲ್ಲಿ ಅನ್ವಯಿಸದಿದ್ದರೆ ಬಳ್ಳಿಗೆ 500 ಗ್ರಾಂ ಡೊಲಮೈಟ್ ಒದಗಿಸಿ. ಪಾಲ್ವಾನ್/ಸ್ಯಾಂಡರ್ಡ ನೆಡುವುದು ಮತ್ತು ನೆರಳು ನಿಯಂತ್ರಣವನ್ನು ಕೈಗೊಳ್ಳುವುದು ಮುಖ್ಯವಾಗಿರುತ್ತದೆ. ಪಾಲ್ವಾನ್/ಸ್ಯಾಂಡರ್ಡಗಳ ಉತ್ತರ ಭಾಗದಲ್ಲಿ ಗುಂಡಿಗಳನ್ನು (50*50*50 ಸೆಂ) ತೆಗೆದು, ಪಾಲ್ವಾನ್ ತಳದಿಂದ 15-30 ಸೆಂ.ಮೀ ದೂರದಲ್ಲಿ ಮೇಲಿನ ಮಣ್ಣು ಮತ್ತು ಟ್ರೈಕೋಡರ್ಮಾ ಹಾರ್ಜಿಯಾನಮ್ (50 ಗ್ರಾಂ/ಗುಂಡಿ) ಮತ್ತು ಪೊಚೋನಿಯಾ ಕ್ಲಮೈಡೋಸ್ರ್ಪೇರಿಯಾ (50 ಗ್ರಾಂ/ ಗುಂಡಿ) ಮಿಶ್ರಣ ಮಾಡಿದ ಕಾಂಪೋಸ್ಟ್ ಅಥವಾ ಚೆನ್ನಾಗಿ ಕೊಳೆತ ಜಾನುವಾರು ಗೊಬ್ಬರದ ಮಿಶ್ರಣದಿಂದ (5 ಕೆ.ಜಿ/ಗುಂಡಿ) ಗುಂಡಿಗಳನ್ನು ತುಂಬಿಸಿ. ಮುಂಗಾರು ಪ್ರಾರಂಭವಾಗುವ ಮೊದಲು ರನ್ನರ್ ಚಿಗುರುಗಳನ್ನು ಕತ್ತರಿಸುವುದು ಅಥವಾ ಪಾಲ್ವಾನ್/ಸ್ಯಾಂಡರ್ಡಗಳಿಗೆ ಹಿಂತಿರುಗಿ ಕಟ್ಟುವುದು ಅವಶ್ಯಕ.

ಸಂಗ್ರಹಣೆ: ಉತ್ಪನ್ನಗಳನ್ನು ಬಹು ದರ್ಜೆಯ ಕಾಗದ/ಪಾಲಿಪ್ರೊಪಿಲೀನ್ ಚೀಲಗಲ್ಲಿ ಆಹಾರ ದರ್ಜೆಯ ಲೈನರ್/ ಗೋಣಿಚೀಲಗಳೊಂದಿಗೆ ಸಂಗ್ರಹಿಸಿ ಮತ್ತು ಪಾಲಿಪ್ರೊಪಿಲೀನ್ ಹಾಳೆಗಳನ್ನು ನೆಲದ ಮೇಲೆ ಹಾಕಿದ ನಂತರ ಮರದ ಹಲಗೆಗಳ ಮೇಲೆ ಜೋಡಿಸಿ.

ಬೆಳೆ ರಕ್ಷಣೆಗೆ ಸಂಬಂಧಿಸಿದಂತೆ ನರ್ಸರಿಗಳಲ್ಲಿ: ಕಟ್ಟುನಿಟ್ಟಾದ ಸ್ವಚ್ಚತೆಯನ್ನು ಅಳವಡಿಸಿಕೊಳ್ಳಿ. ಎಲೆಗಳು ಮತ್ತು ಮಣ್ಣಿನಿಂದ ಹರಡುವ ರೋಗಗಳನ್ನು ನಿರ್ವಹಿಸಲು ಅಗತ್ಯ ಆಧಾರದ ಮೇಲೆ ಬೋರ್ಡೆಕ್ಸ್ ಮಿಶ್ರಣವನ್ನು ಸಿಂಪಡಿಸಿ ( 1 ಕೆ.ಜಿ ತಾಮ್ರದ ಸಲ್ಪೇಟ್ ಮತ್ತು ಸುಣ್ಣವನ್ನು 100 ಲೀಟರ್ ನೀರಿನಲ್ಲಿ)/ ಕಾರ್ಬೆಂಡಾಜಿಮ್ (0.1 % ಅಂದರೆ ಲೀಟರ್‍ಗೆ 1 ಗ್ರಾಂ) ಪೊಟ್ಯಾಷಿಯಮ್ ಫಾಸ್ಫೊನೇಟ್ (0.3 % ಅಂದರೆ 3 ಮಿ.ಲಿ)/ ಮೆಟಲಾಕ್ಸಿಲ್ ಮ್ಯಾಂಕೋಜೆಬ್ (0.125% ಅಂದರೆ 1.25 ಗ್ರಾಂ) ಸಿಂಪಡಿಸಿ. ಹೀರುವ ಕೀಟಗಳಾದ ಶಲ್ಕ/ಸ್ಕೇಲ್ ಕೀಟಗಳು , ಮೀಲಿ ಬಗ್ ಗಳನ್ನು ನಿಯಂತ್ರಿಸಲು ಡೈಮಿಥೋಯೇಟ್ 2 ಎಂಎಲ್/ ಲೀಟರ್ ಅಥವಾ ಥಿಯಾಮೆಥೋಕ್ಸಮ್ 0.5 ಮಿಲಿ/ ಲೀಟರ್ ಸಿಂಪಡಿಸಿ. ನರ್ಸರಿ ಮಿಶ್ರಣವನ್ನು ಸೌರೀಕರಣದ ಮೂಲಕ ಕ್ರಿಮಿನಾಶಗೊಳಿಸಿ ಮತ್ತು ಆರ್ಬಸ್ಕುಲರ್ ಮೈಕೋರೈಜ್ ಸೇರಿಸಿ (100 ಸಿಸಿ/ಕೆ.ಜಿ ಮಿಶ್ರಣ) ಮತ್ತು ಟ್ರೈಕೋಡರ್ಮ ಹಾರ್ಜಿಯಾನಮ್ (1ಗ್ರಾಂ/ಕೆ.ಜಿ ಮಣ್ಣಿನೊಂದಿಗೆ) ಟ್ರೈಕೋಡರ್ಮ 1010 ಸಿಎಫ್ಯು/ಗ್ರಾಂ ಇರುವಂತೆ ಹಾಕಬೇಕು.

ತೋಟಗಳಲ್ಲಿ: ತೀವ್ರವಾದ ಸೋಂಕಿತ (ನಿಧಾನ ಸೊರಗು ರೋಗ/ ಬೆಳವಣಿಗೆ ಕುಂಠಿತಾ ರೋಗ) ಅಥವಾ ಸತ್ತ ಬಳ್ಳಿಗಳನ್ನು ಬೇರುಸಹಿತ ತೆಗೆದು ನಾಶಮಾಡಿ. ಶಲ್ಕ/ಸ್ಕೇಲ್ ಕೀಟಗಳು, ಮೀಲಿಬಗ್‍ಗಳು ಮುಂತಾದ ಹೀರುವ ಕೀಟಗಳನ್ನು ನಿಯಂತ್ರಸಲು ಡೈಮಿಥೋಯೇಟ್ 2 ಮಿಲೀ/ಲೀಟರ್ ಅಥವಾ ಥಂiÀiಮೆಥೋಕ್ಸಮ್ 0.5 ಗ್ರಾಂ/ ಲೀಟರ್ ಸಿಂಪಡಿಸಬೇಕು.

ಏಲಕ್ಕಿ ಬೆಳೆಗೆ ಸಂಭಂಧಿಸಿದಂತೆ ನರ್ಸರಿ ನಿರ್ವಹಣೆ: ಅವಶ್ಯಕತೆಯ ಆಧಾರದ ಮೇಲೆ ಸಸಿಮಡಿ/ಪಾಲಿಬ್ಯಾಗ್/ಕಂದು/ಸಕ್ಕರ್ ನರ್ಸರಿಗಳಿಗೆ ನಿಯಮಿತವಾಗಿ ನೀರಾವರಿ ಒದಗಿಸಿ. ನರ್ಸರಿಯನ್ನು ನೇರ ಸೂರ್ಯನ ಬೆಳಕಿಗೆ ಒಡ್ಡಿಕೊಳ್ಳುವುದನ್ನು ತಪ್ಪಿಸಬೇಕು.

ತೋಟಗಳಲ್ಲಿ: ಗಿಡಗಳ ಬುಡಗಳಿಗೆ ಸಾಕಷ್ಟು ಹಸಿರು/ಒಣ ಹೋದಿಕೆ ಮತ್ತು ನೀರಾವರಿ ಒದಗಿಸಿ (10-15 ದಿನಗಳಲ್ಲಿ ಒಮ್ಮೆ ತುಂತುರು ನೀರಾವರಿ 4 ಗಂಟೆಗಳ ಕಾಲ 25 ಮಿ.ಮೀ) / ಹನಿ ನೀರಾವರಿ (ಎರಡು ದಿನಗಳಲ್ಲಿ ಒಮ್ಮೆ 8-10 ಲೀಟರ್) / ಕಿರು ತುಂತುರು (ವಾರಕ್ಕೆ ಒಮ್ಮೆ 2-3 ಗಂಟೆಗಳ ಕಾಲ). 40-60% ಫಿಲ್ಟರ್ ಮಾಡಿದ ಸೂರ್ಯನ ಬೆಳಕನ್ನು ಒದಗಿಸಲು ನೆರಳು ನಿಯಂತ್ರಣವನ್ನು ಕೈಗೊಳ್ಳಿ. ಎಲೆಗಳ ಮೇಲೆ ಸೂರ್ಯನ ಬೆಳಕಿನಿಂದ ಹಾನಿಯಾಗದಂತೆ ಸುಣ್ಣವನ್ನು (2 ಕೆಜಿ /100 ಲೀಟರ್ ನೀರಿನಲ್ಲಿ) ಸಿಂಪಡಿಸಿ. ನೀರಾವರಿ ತೋಟಗಳಲ್ಲಿನ ಕ್ಯಾಪ್ಸುಲ್ಗಳ ಪಕ್ವತೆಗೆ ಅನುಗುಣವಾಗಿ 25- 30 ದಿನಗಳ ಅಂತರದೊಂದಿಗೆ ಕೊಯ್ಲು ಮುಂದುವರಿಸಿ. ಯಾವುದೇ ಕೀಟನಾಶಕ ಸಿಂಪಡಣೆ ಮಾಡುವಾಗ 20-25 ದಿನಗಳ ಪೂರ್ವ ಕೊಯ್ಲು ಮಧ್ಯಂತರವನ್ನು ನೀಡಬೇಕು. ಹಸಿರು ಬಣ್ಣ ಮತ್ತು ಗುಣಮಟ್ಟವನ್ನು ಉಳಿಸಿಕೊಳ್ಳಲು ಮರದ ಪೆಟ್ಟಿಗೆಯೊಳಗೆ 300 ಗೇಜ್ ಕಪ್ಪು ಪಾಲಿಥಿನ್ ಲೇಪಿತ ಗೋಣಿ ಚೀಲಗಳಲ್ಲಿ 10% ತೇವಾಂಶದಿಂದ ಸಂಸ್ಕರಿಸಿದ ಏಲಕ್ಕಿ ಕ್ಯಾಪ್ಸುಲ್ಗಳನ್ನು ಸಂಗ್ರಹಿಸಿ. ಸಾಕಷ್ಟು ಬೇಸಿಗೆ ಮಳೆ ಬಂದ ನಂತರ, ಸಸಿ/ಕಂದುಗಳನ್ನು ತೋಟದಲ್ಲಿ ನೆಡಬಹುದು. ವಿಶೇಷವಾಗಿ ನೀರಿನ ನಿಶ್ಚಲತೆಯನ್ನು ತಪ್ಪಿಸಲು ಸಾಕಷ್ಟು ಒಳಚರಂಡಿ ಸೌಲಭ್ಯವನ್ನು ಖಚಿತಪಡಿಸಿಕೊಳ್ಳಿ. ಮಾನ್ಸೂನ್ ಶವರ್ಗೆ ಮುಂಚಿತವಾಗಿ, ಅನುಪಯುಕ್ತ ಕಾರ್ಯಾಚರಣೆಯನ್ನು ಪೂರ್ಣಗೊಳಿಸಬಹುದು ಮತ್ತು ಎಲ್ಲಾ ಪ್ಯಾನಿಕಲ್ಗಳನ್ನು ಹಸಿರು/ಒಣ ಹೋದಿಕೆ(ಮಲ್ಚ್) ಮೇಲೆ ಇರಿಸಲಾಗಿದೆಯೆ ಎಂದು ಖಚಿತಪಡಿಸಿಕೊಳ್ಳಿ.

ಮೇ ಕೊನೆಯಲ್ಲಿ ಅಥವಾ ಜೂನ್ ಆರಂಭದಲ್ಲಿ ಒಂದು ಅಥವಾ ಎರಡು ಸಮರ್ಪಕ ಮಳೆಯಾದ ನಂತರ ನೀರಾವರಿ ಪ್ರದೇಶಗಳಿಗೆ ಮೊದಲ ಸುತ್ತಿನ ಗೊಬ್ಬರವನ್ನು ಹಾಕಬಹುದು. ಜಮೀನಿನಲ್ಲಿ ಸಾವಯವ ಗೊಬ್ಬರಗಳಾದ ಸಗಣಿ ಗೊಬ್ಬರ ಅಥವಾ ಕಾಂಪೆÇೀಸ್ಟ್ 5 ಕೆಜಿ ಅಥವಾ ಬೇವಿನ ಕೇಕನು (1-2 ಕೆ.ಜಿ.) 20 ಸೆಂ.ಮೀ ಅಗಲದ ವೃತ್ತಾಕಾರದ ಬ್ಯಾಂಡ್‍ನಲ್ಲಿ ಸಸ್ಯದ ಬುಡಾದಿಂದ 30-40 ಸೆಂ.ಮೀ ದೂರದಲ್ಲಿ ನೀಡಬೇಕು.

ಸಂಗ್ರಹಣೆ: ಕ್ಯಾಪ್ಸುಲ್‍ಗಳನ್ನು ಸೂರ್ಯನ ಕೆಳಗೆ ಒಣಗಿಸಬಹುದು ಅಥವಾ ಗೂಡುಗಳಲ್ಲಿ ಫ್ಲೂ ಗುಣಪಡಿಸಬಹುದು. ಒಣಗಿದ ಕ್ಯಾಪ್ಸುಲ್ಗಳನ್ನು (<10% ತೇವಾಂಶ) ಹೊಳಪುಗೊಳಿಸಿ, ಶ್ರೇಣೀಕರಿಸಿ, 300 ಗೇಜ್ ಕಪ್ಪು ಪಾಲಿಥೀನ್ ಲೇಪಿತ ಗೋಣಿ ಚೀಲಗಳಲ್ಲಿ ಕೋಣೆಯ ಉμÁ್ಣಂಶದಲ್ಲಿ ಸಂಗ್ರಹಿಸಬೇಕು.

ಬೆಳೆ ರಕ್ಷಣೆಗೆ ಸಂಬಂಧಿಸಿದಂತೆ ನರ್ಸರಿಗಳಲ್ಲಿ: ಕಟ್ಟುನಿಟ್ಟಾದ ಫೈಟೊಸಾನಿಟೇಶನ್(ಸ್ವಚತೆ) ಯನ್ನು ಅಳವಡಿಸಿಕೊಳ್ಳಿ. ಪ್ರಾಥಮಿಕ ನರ್ಸರಿಗಳಲ್ಲಿ ಸಸಿಗಳ ಹೆಚ್ಚು ಜನಸಂದಣಿಯನ್ನು ತಪ್ಪಿಸಿ ಮತ್ತು ಮೊಳಕೆ ಕೊಳೆತವನ್ನು ನಿರ್ವಹಿಸಲು ಸಾಕಷ್ಟು ಒಳಚರಂಡಿಯನ್ನು ಒದಗಿಸಿ. ಆರಂಭಿಕ ರೋಗಲಕ್ಷಣಗಳನ್ನು ಗಮನಿಸಿದ ನಂತರ ಕ್ರಮವಾಗಿ ಎಲೆ ಚುಕ್ಕೆ ಮತ್ತು ಎಲೆ ಕೊಳೆತ ರೋಗಗಳನ್ನು ನಿರ್ವಹಿಸಲು ಮ್ಯಾಂಕೋಜೆಬ್ (0.3% ಅಂದರೆ ಲೀಟರ್ಗೆ 3 ಗ್ರಾಂ) ಮತ್ತು ಕಾಬೆರ್ಂಡಜಿಮ್ (ಲೀಟರ್ಗೆ 0.2% ಅಂದರೆ 2 ಗ್ರಾಂ) ಸಿಂಪಡಿಸಿ. ಮಣ್ಣಿನಿಂದ ಹರಡುವ ರೋಗಗಳನ್ನು ನಿರ್ವಹಿಸಲು ಒಂದು ಮೀಟರ್ ಚದರ ಪ್ರದೇಶಕೆ 3-5 ಲೀಟರ್ ತಾಮ್ರದ ಆಕ್ಸಿಕ್ಲೋರೈಡ್ (ಅಔಅ) (0.2% ಅಂದರೆ ಪ್ರತಿ ಲೀಟರ್ಗೆ 2 ಗ್ರಾಂ) ಸಿಂಪಡಿಸಬೇಕು.

ತೋಟಗಳಲ್ಲಿ: ಒಣಗಿದ ನೇತಾಡುವ ಎಲೆಗಳು ಕಾಂಡಗಳನ್ನು ತೆಗೆದುಹಾಕಿ. ಗಿಡದ ಬುಡ ಪ್ರದೇಶಗಳನ್ನು ಸ್ವಚಗೊಳಿಸುವುದನ್ನು ಮತ್ತು ಕಟ್ಟುನಿಟ್ಟಾದ ಫೈಟೊಸಾನಿಟೇಶನ್(ಸ್ವಚತೆ) ಯನ್ನು ಅಳವಡಿಸಿಕೊಳ್ಳಿ. ವೈರಸ್ ರೋಗಗಳನ್ನು (ಕಟ್ಟೆ, ಕ್ಲೋರೋಟಿಕ್ ಸ್ಟ್ರೀಕ್ ಮತ್ತು ಕೊಕೆ ಕಂದು) ನಿರ್ವಹಿಸಲು, ನಿಯಮಿತ ಮೇಲ್ವಿಚಾರಣೆ, ಸೋಂಕಿತ ಸಸ್ಯಗಳನ್ನು ಪತ್ತೆಹಚ್ಚುವುದು ಮತ್ತು ನಾಶಪಡಿಸುವುದು, ವೈರಸ್ ಆಶ್ರಯ ಸಸ್ಯಗಳನ್ನು (ಕೊಲೊಕಾಸಿಯಾ ಮತ್ತು ಕ್ಯಾಲಾಡಿಯಂನಂತಹ) ತೆಗೆದುಹಾಕುವುದು. ಚೆಂಥಾಲ್ ರೋಗವನ್ನು ನಿರ್ವಹಿಸಲು ನೆರಳು ಮಟ್ಟವನ್ನು (40-60%) ಕಾಯ್ದುಕೊಳ್ಳಿ, ಸೋಂಕಿತ ಎಲೆಗಳನ್ನು ತೆಗೆದುಹಾಕಿ ಮತ್ತು ನಾಶಮಾಡಿ, 1%ಬೋರ್ಡೆಕ್ಸ್ ಮಿಶ್ರಣವನ್ನು (ಅಂದರೆ 1 ಕೆಜಿ ಪ್ರತಿ ತಾಮ್ರದ ಸಲ್ಫೇಟ್ ಮತ್ತು ಸುಣ್ಣವನ್ನು 100 ಲೀಟರ್ನಲ್ಲಿ) / 0.2% ಕಾಬೆರ್ಂಡಾಜಿಮ್ (ಅಂದರೆ ಪ್ರತಿ ಲೀಟರ್ಗೆ 2 ಗ್ರಾಂ) / 0.1% ಕಾಬೆರ್ಂಡಾಜಿಮ್-ಮ್ಯಾಂಕೋಜೆಬ್ (ಅಂದರೆ ಪ್ರತಿ ಲೀಟರ್ಗೆ 1 ಗ್ರಾಂ) ಸಿಂಪಡಿಸಿ. ಥ್ರಶಿಂಗ್ ಅನ್ನು ಕೈಗೊಂಡ ನಂತರ ಥ್ರೈಪ್ಸ್ ಕೀಟಗಳನ್ನು ನಿರ್ವಹಿಸಲು ಕ್ವಿನಾಲ್ಫೋಸ್ (ಲೀಟರ್ಗೆ 2 ಎಂಎಲ್) ಅಥವಾ ಫಿಪೆÇ್ರನಿಲ್ (ಲೀಟರ್ಗೆ 1 ಎಂಎಲ್) ಅಥವಾ ಸ್ಪಿನೋಸಾಡ್ (ಲೀಟರ್ಗೆ 0.3 ಎಂಎಲ್) ಸಿಂಪಡಿಸಿ. ಕ್ವಿನಾಲ್ಫೋಸ್ ಸಿಂಪಡಿಸುವುದರಿಂದ ಕಾಂಡ ಕೊರೆಯುವ ಕೀಟವನ್ನು ನಿಯಂತ್ರಿಸಲು ಸಹಾಯ ಮಾಡುತ್ತದೆ. ನೆಮಟೋಡ್/ದಂಡಾಣ್ಣುದಾಳಿ ಗಮನಿಸಿದರೆ, ಸಸ್ಯದ ಗಾತ್ರವನ್ನು ಅವಲಂಬಿಸಿ ಬೇವಿನ ಎಣ್ಣೆ ಕೇಕ್ 250 ರಿಂದ 1000 ಗ್ರಾಂ ನೀಡಬೇಕು.

ಶುಂಠಿ ಮತ್ತು ಅರಶಿಣ ಬೆಳೆ ಉತ್ಪಾದನೆಗೆ ಸಂಬಂಧಿಸಿದಂತೆ: ಮಣ್ಣಿನ ರಸಸಾರ ಆರಕ್ಕಿಂತ ಕಡಿಮೆ ಇದ್ದರೆ 1 ರಿಂದ 2 ಟನ್ ಪ್ರತೀ ಹಕ್ಟೆರಿಗೆ ಕೃಷಿ ಸುಣ್ಣವನ್ನು ನೀಡಬೇಕು. 30-40 ಟನ್ ಅರಶಿಣ ಬೆಳೆಗೆ ಮತ್ತು 25 – 30 ಟನ್ ಶುಂಠಿ ಬೆಳೆಗೆ ಚೆನ್ನಾಗಿ ಕೊಳೆತ ಕೊಟ್ಟಗೆ ಗೊಬ್ಬರ ಅಥವಾ ಕಾಂಪೊಸ್ಟ್ ಅನ್ನು ಪ್ರತಿ ಹೆಕ್ಟೇರ್ ಮಡಿಗಲಿಗೆ ಎರಚುವುದು ಅಥವಾ ಬಿತ್ತನೆ ಮಾಡುವಾಗ ಮಡಿಗಳಿಗೆ ಹಾಕುವುದು. 2 ಟನ್ ಬೇವಿನ ಹಿಂಡಿಯನ್ನು ಬಿತ್ತನೆ ಮಾಡುವಾಗ ಹಾಕಬೇಕು. ಭೂಮಿಯನ್ನು ಸಿದ್ದಪಡಿಸಿದ ನಂತರ 1 ಮೀಟರ್ ಅಗಲ, 30 ಸೆಂ.ಮೀ ಎತ್ತರ ಮತ್ತು ಅನುಕೂಲಕ್ಕೆ ತಕ್ಕಂತೆ ಮಡಿಗಳನ್ನು ಮಾಡಬೇಕು. 20-25 ಗ್ರಾಂ ತೂಕವಿರುವ ಕನಿಷ್ಟ 1 ಅಥವಾ 2 ಮೊಗ್ಗು ಇರುವ ಬೇರು ಕಾಂಡಗಳನ್ನು ಬಿತ್ತನೆ ಮಾಡಬೇಕು. ನಂತರ ಮಡಿಗಳ ಮೇಲೆ 15 ಟನ್ ನಷ್ಟು ಪ್ರತಿ ಹೆಕ್ಟೆರಿಗೆ ಹಸಿರು ಎಲೆ ಸಾವಯಾವ ತ್ಯಾಜ್ಯ ವಸ್ತುಗಳನ್ನು ಹೊದಿಕೆ ಮಾಡಬೇಕು. ಶಿಫಾರಸ್ಸು ಮಾಡಿದ ಪೋಷಕಾಂಶಗಳನ್ನು 2-3 ಬಾಗಗಳಾಗಿ ನೀಡಬೇಕು. ಪೂರ್ತಿ ಪ್ರಮಾಣದ ಸಾರಜನಕ ಮತ್ತು ಪೊಟ್ಯಾಷ್‍ಅನ್ನು ನಾಟಿಮಾಡಿದ 45 ಮತ್ತು 90 ದಿನಗಳಲ್ಲಿ ನೀಡಬೇಕು. ರಸಗೊಬ್ಬರವನ್ನು ನೀಡಿದ ನಂತರ ಮಣ್ಣು ಏರಿಸಿ ಮಡಿಗಳಿಗೆ ಹೊದಿಕೆಯನ್ನು ಮಾಡಬೇಕು. ಬಿತ್ತನೆ ಬೀಜ ಕಡಿಮೆ ಮಾಡಲು ಪ್ರೊಟ್ರೆ ತಂತ್ರಜ್ಞಾನವನ್ನು ಅಳವಡಿಸುವುದರಿಂದ ಉತ್ತಮ ಆರೋಗ್ಯಕರ ಸಸಿಗಳನ್ನು ಪಡೆಯಬಹುದು.

ಸಂಗ್ರಹಣೆ: ಬೀಜದ ಜೊತೆಗೆ ಮರದ ಪುಡಿ ಮತ್ತು ಸ್ಟ್ರಿಕನಾಸ್ ನಕ್‍ಸೊಮಿಕ ಗಿಡದ ಒಣಗಿದ ಎಲೆಗಳ ಜೊತೆ ಶೇಕರಿಸಿಡಬೇಕು. ಬೀಜಕ್ಕೋಸ್ಕರ ತೋಟದಿಂದ ರೊಗವಿಲ್ಲದ ಬೀಜವನ್ನು ಆರೋಗ್ಯದಾಯಕ ರೋಗರಹಿತ ಬೀಜವನ್ನು ಆಯ್ಕೆಮಾಡಬೇಕು. ಆಯ್ಕೆ ಮಾಡಿದ ಬೇರುಕಾಂಡವನ್ನು 30 ನಿಮಿಷಗಳ ಕಾಲ ಕ್ವಿನಾಲ್ ಪಾಸ್ (3 ಎಮ್ ಎಲ್/ಲೀಟರ್ ನೀರಿಗೆ) ಮತ್ತು ಮ್ಯಾಂಕೋಜೆಬ್(3 ಗ್ರಾಂ ಪ್ರತಿ ಲೀಟರ್ ನೀರಿಗೆ) ದ್ರಾವಣದಲ್ಲಿ ನೆನೆಸಿ ತೆಗೆದು ನೆರಳಿನಲ್ಲಿ ಒಣಗಿಸಬೇಕು. ಮಣ್ಣಿನ ಸೌರಿಕರಣವನ್ನು (ಸೊಲರೈಸೇಶನ್) ಮಾಡುವುದರಿಂದ ಮಣ್ಣಿನಿಂದ ಹರಡುವ ರೋಗವನ್ನು ಹತೋಟಿಮಾಡಬಹುದು.

ವೆನಿಲ್ಲಾ ಬೆಳೆ ಉತ್ಪಾದನೆಗೆ ಸಂಬಂಧಿಸಿದಂತೆ: ಶೇ 50 ರಷ್ಟು ನೆರಳು ಬಲೆ ಮಾಡಿ, ಮಿಸ್ಟ್ ನೀರಾವರಿ ಪ್ರತಿದಿನ 4 ರಿಂದ 6 ಗಂಟೆ ಕೊಡಿ ಕಾರ್‍ಬೆಂಡೇಜಿಮ್ (0.25 %, 2.5 ಗ್ರಾಂ/ಲೀಟರ್), ಕಾಯಿ ಹಳದಿಯಾಗುವುದು ಮತ್ತು ಬೀಳುವುದನ್ನು ತಡೆಗಟ್ಟಲು ಸಿಂಪಡಣೆಮಾಡುವಂತೆ ತಿಳಿಸಲಾಗಿದೆ.

Muliya Jewels (Shyama Jewels Madikeri Pvt.Ltd), Mahadevpet Rd, Mahadevpet, Madikeri, Karnataka 571201

Muliya Jewels (Shyama Jewels Madikeri Pvt.Ltd), Mahadevpet Rd, Mahadevpet, Madikeri, Karnataka 571201

ಮುಳಿಯ ಜ್ಯುವೆಲ್ಸ್‌ನ ವಿನೂತನ ಹೆಜ್ಜೆ: ಗ್ರಾಹಕರಿಗೆ ಮನೆಯಿಂದಲೇ ಲೈವ್ ಆಭರಣ ಖರೀದಿ ವ್ಯವಸ್ಥೆ

Search Coorg Media“ಸರ್ಚ್‌ ಕೂರ್ಗ್‌ ಮೀಡಿಯಾ” ಗ್ರಾಮೀಣ ಪತ್ರಿಕೋದ್ಯಮದಲ್ಲಿ‌ ಕೃಷಿ, ಪರಿಸರ, ವಿಜ್ಞಾನ ಮತ್ತು ಗ್ರಾಮೀಣ ಜೀವನವನ್ನು ಕೇಂದ್ರೀಕರಿಸುವ ಆನ್‌ಲೈನ್‌ ಮಾಧ್ಯಮವಾಗಿ ಸಾವಿರಾರು ಚಂದಾದಾರರೊಂದಿಗೆ, searchcoorg.com ಈಗ ಅತಿದೊಡ್ಡ ಹಾಗೂ ಅತಿ ವಿಸ್ತರಾವಾದ ಕೊಡಗಿನ ಜನಪ್ರಿಯ ಮಾಧ್ಯಮವಾಗಿ ಪರಿಣಮಿಸಿದೆ.

For More Details Log on to https://muliya.in/

ಬದುಕೊಂದು ಯುದ್ಧಭೂಮಿಯಾಗಿದೆ. ಧೈರ್ಯವಾಗಿ ಹೋರಾಡಿ; ಐದು ಸಾವಿರ ವರುಷಗಳ ಹಿಂದೆ ಶ್ರೀ ಕೃಷ್ಣ ಜಗತ್ತಿಗೆ ನೀಡಿದ ಸಂದೇಶ

ಬದುಕೊಂದು ಯುದ್ಧಭೂಮಿಯಾಗಿದೆ. ಧೈರ್ಯವಾಗಿ ಹೋರಾಡಿ;
ಐದು ಸಾವಿರ ವರುಷಗಳ ಹಿಂದೆ ಶ್ರೀ ಕೃಷ್ಣ ಜಗತ್ತಿಗೆ ನೀಡಿದ ಸಂದೇಶ

2019 ಡಿಸೆಂಬರ್‌ 8 ಶ್ರೀ ‌ಕೃಷ್ಣನಿಂದ ಭಗವದ್ಗೀತೆ ಬೋಧಿಸಲ್ಪಟ್ಟ ದಿನ. ನಮ್ಮಲ್ಲೊಂದು ಅಭಿಪ್ರಾಯವಿದೆ. ಭಗವದ್ಗೀತೆ, ರಾಮಾಯಣ, ಮಹಾಭಾರತ, ಭಾಗವತ, ಉಪನಿಷತ್ತು ಇವೆಲ್ಲ ಪ್ರಾಯವಾದವರಿಗೆ. ಅಜ್ಜಂದಿರಿಗೆ. ಕೈಲಾಗದೆ ಕೂತವರಿಗೆ. ಊರುಗೋಲಿಲ್ಲದೆ ನಡೆದಾಡಲು ಆಗದ ಸ್ಥಿತಿಗೆ ತಲುಪಿದ ಮೇಲೆ ಇವೆಲ್ಲ ವೇದಾಂತಗಳು. ಅಲ್ಲಿಯವರೆಗೆ ನಮಗೆ ಧರ್ಮಗ್ರಂಥಗಳು ಬೇಕಾಗಿಲ್ಲ, ಅಂತ. ಭಗವದ್ಗೀತೆ ಅಧ್ಯಯನದಿಂದ ಜೀವನದಲ್ಲಿ ನೆಮ್ಮದಿ ಹಾಗೂ ಶಾಂತಿ ಲಭಿಸುತ್ತದೆ. ಜತೆಗೆ ಉತ್ತಮ ಜೀವನ ರೂಪಿಸಿಕೊಳ್ಳಲು ಸಹಕಾರಿಯಾಗುತ್ತದೆ.
ಮಾನವಕೋಟಿಯ ಮೇಲೆ ಕರುಣೆಯಿಂದ ಶ್ರೀಕೃಷ್ಣ ಪರಮಾತ್ಮನು ಮಾನವ ಬದುಕಿಗೆ ಅವಶ್ಯಕವೆನಿಸುವ ತತ್ವವನ್ನು ಸಾಮಾನ್ಯನೂ ತಿಳಿದುಕೊಳ್ಳಬಲ್ಲಂಥ ತಿಳಿಯಾದ ಭಾಷೆಯಲ್ಲಿ ಭಗವದ್ಗೀತೆಯ ರೂಪದಲ್ಲಿ ಅಮೃತಧಾರೆಯಾಗಿ ಸುರಿಸಿರುವನು. ಇದು ಎಲ್ಲ ಉಪನಿಷತ್ತುಗಳ ಸಾರ. ಮನುಷ್ಯನ ಜೀವನದಲ್ಲಿ ಸುಖದುಃಖಗಳ ಏರಿಳಿತ ನಿರಂತರವಾಗಿರುತ್ತದೆ. ಮನುಷ್ಯ ಸುಖ ಬಂದಾಗ ಹಿಗ್ಗುತ್ತಾನೆ, ದುಃಖ ಬಂದಾಗ ಕುಗ್ಗುತ್ತಾನೆ. ಎರಡನ್ನೂ ಸಮಚಿತ್ತದಿಂದ ಸ್ವೀಕರಿಸುವುದು ಎಲ್ಲರಿಗೂ ಸಾಧ್ಯವಿಲ್ಲ. ಆದರೆ ಈ ಸಮಚಿತ್ತ ಪ್ರತಿಯೊಬ್ಬನಿಗೂ ಅತ್ಯಗತ್ಯ. ಈ ಕೌಶಲವನ್ನು ಕಲಿಸುವುದು ಭಗವದ್ಗೀತೆ. ಪ್ರಪಂಚದ ಮೊಟ್ಟ ಮೊದಲ ಮನಃಶಾಸ್ತ್ರ ಗ್ರಂಥ ಭಗವದ್ಗೀತೆಯಾಗಿದ್ದು, ಯಾವುದೇ ಜಾತಿ ಧರ್ಮದ ಹಂಗಿಲ್ಲದೆ ಎಲ್ಲಾ ವರ್ಗದ ಜನರೂ ಇದನ್ನು ಅಧ್ಯಯನ ಮಾಡಿ ಜೀವನವನ್ನು ಸಾರ್ಥಕ ಗೊಳಿಸಿಕೊಳ್ಳಬಹುದಾಗಿದೆ.
ಮಹಾಭಾರತ ಹೇಳುವುದು ಐದು ಸಾವಿರ ವರ್ಷಗಳ ಹಿಂದೆ ಕೌರವ ಪಾಂಡವರ ನಡುವೆ ನಡೆದ ಇತಿಹಾಸವನ್ನಲ್ಲ. ಇದು ನಮ್ಮ ಜೀವನದ, ಮುಖ್ಯವಾಗಿ ಅಂತರಂಗ ಪ್ರಪಂಚದ ನಿರಂತರ ಹೋರಾಟದ ಚಿತ್ರಣ. ನಮ್ಮ ಜೀವನವೇ ಒಂದು ಸಂಗ್ರಾಮ. ನಮ್ಮ ಹೃದಯರಂಗವೇ ಕುರುಕ್ಷೇತ್ರ. ಅದರೊಳಗೆ ನಮ್ಮನ್ನು ದಾರಿ ತಪ್ಪಿಸುವ ಕೌರವರಿದ್ದಾರೆ, ಎಚ್ಚರಿಸುವ ಪಾಂಡವರೂ ಇದ್ದಾರೆ. ಹದಿನೆಂಟು ಅಕ್ಷೋಹಿಣಿ ಸೇನೆಯೂ ಇದೆ. ಆದರೆ ನಮ್ಮ ಹೋರಾಟದಲ್ಲಿ ಪಾಂಡವರು ಸೋತು ಕೌರವರು ಗೆದ್ದುಬಿಡುವ ಸಂಭವ ಹೆಚ್ಚು. ಆದರೆ ಹಾಗಾಗದೆ ನಮ್ಮಲ್ಲೂ ಪಾಂಡವರೇ ಗೆಲ್ಲಬೇಕು. ಅದಕ್ಕಾಗಿ ನಮ್ಮ ಬಾಳ ರಥದ ಸಾರಥ್ಯವನ್ನು ಆ ಭಗವಂತನ ಕೈಗೊಪ್ಪಿಸಬೇಕು. ಇದೇ ನರ(ಅರ್ಜುನ)ನ ಮೂಲಕ ನಮಗೆ ನಾರಾಯಣನಿತ್ತ ಗೀತೋಪದೇಶ. ಜ್ಞಾನ ಸಂದೇಶ ಮತ್ತು ಅದರ ಪ್ರಾಯೋಗಿಕ ನಿರೂಪಣೆಯನ್ನು ನಮಗೆ ಭಗವಂತ ನೀಡಿರುವುದು ಮಹಾಭಾರತದ ಮೂಲಕ.
ಭಗವದ್ಗೀತೆಯು ನಮಗೆ ಉತ್ತಮ ಸಂದೇಶಗಳನ್ನು ನೀಡಿದೆ. ಬೆಂಕಿಪೊಟ್ಟಣದ ಪ್ರತಿ ಕಡ್ಡಿಗಳು ಜ್ಯೋತಿಯನ್ನು ಹೇಗೆ ಬೆಳಗಿಸುತ್ತವೆಯೋ ಹಾಗೇ ಭಗವದ್ಗೀತೆಯ ಪ್ರತಿ ಶ್ಲೋಕಗಳು ಜೀವನಕ್ಕೆ ಉತ್ಸಾಹ ನೀಡುತ್ತವೆ. ಹದಿನೆಂಟು ಪರ್ವಗಳ ಮಹಾಭಾರತದ ಸಾರವಾಗಿ ಭಗವದ್ಗೀತೆಯಲ್ಲಿ ಹದಿನೆಂಟು ಅಧ್ಯಾಯಗಳಿದ್ದು, ಶ್ರೀ ಕೃಷ್ಣನ ಗೀತೋಪದೇಶ ಮಾನವನ ಜೀವನದ ಮೌಲ್ಯಗಳನ್ನು ಎತ್ತಿ ಹಿಡಿಯುವ ಕೈಗನ್ನಡಿಯಾಗಿದೆ. ಒಂದು ಜಾತಿ ಅಥವಾ ಮತಕ್ಕೆ ಮಾತ್ರ ಸೀಮಿತವಾಗದೆ ಇಡೀ ಮಾನವ ಜನಾಂಗಕ್ಕೇ ಇದು ದಾರಿದೀಪವಾಗಿದೆ. ಅದ್ಭುತ ಶಕ್ತಿಯುಳ್ಳ ಪ್ರತಿ ಶ್ಲೋಕವೂ ಜೀವನದ ಹಲವು ಸಮಸ್ಯೆಗಳಿಗೆ ಪರಿಹಾರ ಸೂಚಿಸುವ ದಿವ್ಯ ಪ್ರಭೆಯಾಗಿದೆ. ಸತ್ಯದ ಪೂರ್ಣದೃಷ್ಟಿ ಇಲ್ಲಿದೆ. ಭಗವದ್ಗೀತೆಯ ತತ್ವ ಜಿಜ್ಞಾಸೆ ಆಗಸದಷ್ಟು ವಿಶಾಲ, ಕಡಲಿನಷ್ಟು ಆಳ. ತನ್ನೆಡೆಗೆ ಬಂದ ಯಾರನ್ನೂ ಗೀತೆ ನಿರಾಸೆಯಿಂದ ಹಿಂದಕ್ಕೆ ಕಳಿಸುವುದಿಲ್ಲ, ಅವರವರ ಯೋಗ್ಯತೆಗೆ ತಕ್ಕಂತೆ ಮಾರ್ಗದರ್ಶನವನ್ನು ನೀಡುತ್ತದೆ.
ಕೃಷ್ಣ ಹೇಳುತ್ತಾನೆ: “ಸೋಲೋ ಗೆಲುವೋ ಏನೋ ಒಂದು; ಆದರೆ ಕೆಲಸದಲ್ಲಿ ಆಸಕ್ತಿ ಕಳೆದುಕೊಳ್ಳದಿದ್ದರೆ ಸಾಕು!” ಈ ಅದ್ಭುತ ಸಂದೇಶವನ್ನು ಹೇಳುವ ಭಗವದ್ಗೀತೆಯನ್ನು ಯೌವನದಲ್ಲಿ ಓದದೆ ಮತ್ಯಾವಾಗ, ಕೈಗೆ ಊರುಗೋಲು ಬಂದಮೇಲೆ ಓದಬೇಕೇ ಎಂಬುದು ನಿಮ್ಮಲ್ಲಿ ನನ್ನ ಪ್ರಶ್ನೆ? ಭಗವದ್ಗೀತೆ ಕೇವಲ ಒಂದು ಧಾರ್ಮಿಕ ಗ್ರಂಥವಲ್ಲ. ಅದೊಂದು ಬೆಸ್ಟ್‌ ಪರ್ಸನಾಲಿಟಿ ಡೆವಲಪ್‌ಮೆಂಟ ಹಾಗೂ ಮೋಟಿವೆಷನಲ್ ಬುಕ್ ಕೂಡ ಆಗಿದೆ. ಅದರಲ್ಲಿ ನಮ್ಮೆಲ್ಲ ಸಮಸ್ಯೆಗಳಿಗೆ ಪರಿಹಾರಗಳಿವೆ. ನಮ್ಮೆಲ್ಲ ಪ್ರಶ್ನೆಗಳಿಗೆ ಉತ್ತರಗಳಿವೆ. ನೀವು ತಪ್ಪದೆ ಒಂದ್ಸಾರಿ ಭಗವದ್ಗೀತೆಯನ್ನು ಓದಿ. ಖಂಡಿತ ನಿಮ್ಮ ಲೈಫ್‌ ಸಕ್ಸೆಸ್‌ ಫುಲ್ಲಾಗುತ್ತದೆ. ಭಗವದ್ಗೀತೆಯಿಂದ ಹೆಕ್ಕಿ ತೆಗೆದ ಕೆಲವು ವಿಷಯಗಳು ಇಂತಿವೆ ;
“ನಮ್ಮ ಮನಸ್ಸು ನಮ್ಮ ಅಸಲಿ ಮಿತ್ರ ಹಾಗೂ ಅಸಲಿ ಶತ್ರುವಾಗಿದೆ. ನಮ್ಮ ಮನಸ್ಸು ನಮ್ಮ ನಿಯಂತ್ರಣದಲ್ಲಿದ್ದರೆ ಅದಕ್ಕಿಂತ ಒಳ್ಳೇ ಮಿತ್ರ ಬೇರ್ಯಾರಿಲ್ಲ. ಅದೇ ಮನಸ್ಸು ನಮ್ಮ ನಿಯಂತ್ರಣ ತಪ್ಪಿ ಹೋದರೆ ಅದಕ್ಕಿಂತ ಕೆಟ್ಟ ಶತ್ರು ಬೇರೆಯಾರಿಲ್ಲ. ನಾವು ನಮ್ಮ ಮನಸ್ಸನ್ನು ಗೆದ್ದರೆ ಎಲ್ಲವನ್ನೂ ಗೆದ್ದಂತೆ.”
“ಇಲ್ಲಿ ತನಕ ಆಗಿದ್ದೆಲ್ಲವು ಒಳ್ಳೆಯದೇ, ಸದ್ಯಕ್ಕೆ ಆಗುತ್ತಿರುವುದೆಲ್ಲವು ಒಳ್ಳೆಯದೇ, ಮುಂದೆ ಆಗುವುದೆಲ್ಲವು ಒಳ್ಳೆಯದೇ. ಆದಕಾರಣ ಯಾವುದಕ್ಕೂ ಜಾಸ್ತಿ ಚಿಂತಿಸದಿರಿ, ಜಾಸ್ತಿ ಕೊರಗದಿರಿ. ನಿಮ್ಮ ಕೆಲಸಗಳನ್ನು ನೀವು ಸರಿಯಾಗಿ ಮಾಡಿ ಎಲ್ಲವೂ ಒಳ್ಳೆಯದೇ ಆಗುತ್ತದೆ.”
“ಎಲ್ಲದಕ್ಕೂ ಅನುಮಾನಪಡುವವರು ಎಂದಿಗೂ ಖುಷಿಯಾಗಿರಲಾರರು. ಸಂಶಯಾಸ್ಪದವಾದ ಮನಸ್ಸು ಎಂದಿಗೂ ಯಾವುದರ ಮೇಲೆಯೂ ವಿಶ್ವಾಸ ಮಾಡಲಾಗದು. ಸಂಶಯಾಸ್ಪದವಾದ ಮನಸ್ಸು ಎಂದಿಗೂ ನಿಮ್ಮನ್ನು ನಿಮ್ಮ ಗುರಿ ತಲುಪಿಸಲ್ಲ. ಆದ್ದರಿಂದ ಸಂಶಯದಿಂದ ಹೊರಬನ್ನಿ. ಕೆಟ್ಟ ಆಲೋಚನೆಗಳಿಂದ ಹೊರ ಬನ್ನಿ. ಉಚ್ಛ ಯೋಚನೆಗಳನ್ನು ಮಾಡಿ. ಉಚ್ಛ ಕೆಲಸಗಳನ್ನು ಮಾಡಿ.”
“ನಿಮ್ಮ ಕರ್ತವ್ಯದಿಂದ ದೂರ ಓಡಬೇಡಿ. ಅದರ ಪರಿಣಾಮ ಒಳ್ಳೆಯದಾಗಿರದಿದ್ದರೂ ಸಹ ಅದನ್ನು ಪೂರ್ಣಗೊಳಿಸಿ. ನಿಮ್ಮ ಕರ್ತವ್ಯವನ್ನು ನೀವು ಪ್ರಾಮಾಣಿಕವಾಗಿ ಮಾಡಿ. ಫಲಿತಾಂಶವನ್ನು ಭಗವಂತನಿಗೆ ಬಿಟ್ಟು ಬಿಡಿ. ಕೇವಲ ಕರ್ಮ ನಿಮ್ಮ ಕೈಯಲ್ಲಿದೆ, ಫಲ ನಿಮ್ಮ ಕೈಯಲಿಲ್ಲ.”
“ದೇವರನ್ನು ಸೇರಲು ಹಲವಾರು ದಾರಿಗಳಿವೆ. ನೀವು ನಿಮಗೆ ಸರಿಯೆನಿಸಿದ ದಾರಿಯನ್ನು ಆಯ್ಕೆ ಮಾಡಿಕೊಳ್ಳಬಹುದು. ಕರ್ಮಯೋಗ, ಜ್ಞಾನಯೋಗ, ರಾಜಯೋಗ, ಭಕ್ತಿಯೋಗಗಳೆಲ್ಲವು ನಿಶ್ಚಿತವಾಗಿ ದೈವವನ್ನು ಸೇರುತ್ತವೆ. ನಿಮಗೆ ಸೂಕ್ತವಾದ ದಾರಿಯನ್ನು ನೀವು ಆಯ್ಕೆ ಮಾಡಿಕೊಳ್ಳಿ.”
“ಬದುಕೊಂದು ಯುದ್ಧಭೂಮಿಯಾಗಿದೆ. ಧೈರ್ಯವಾಗಿ ಹೋರಾಡಿ. ಕಾಲ ಕೆಳಗಿನ ನೆಲ ಕುಸಿದು ಬಿದ್ದರೂ ಯಾರಿಂದಲೂ ಏನನ್ನೂ ಬಯಸದೆ, ಯಾರಿಗೂ ಹೆದರದೇ ಮುನ್ನುಗ್ಗಿ.”
ಭಗವದ್ಗೀತೆಯ ಸಂದೇಶದಂತೆ ನಡೆದುಕೊಳ್ಳುವುದೇ ನಿಜವಾದ ಧರ್ಮಪಾಲನೆ. ಭಗವದ್ಗೀತೆ ಕಾದಂಬರಿ ಪುಸ್ತಕವಲ್ಲ, ಅದೊಂದು ಜೀವನ ಪದ್ಧತಿ ಸಾರುವ ಪವಿತ್ರ ಗ್ರಂಥ. ದೇಶ, ಕಾಲ, ಜಾತಿ, ಮತ, ಪಂಥಗಳನ್ನೂ ಮೀರಿದ ಸರ್ವಧರ್ಮ ಸಮನ್ವಯದ ಮತ್ತು ಸರ್ವಮಾನ್ಯವಾದ ನಿಘಂಟೂ ಭಗವದ್ಗೀತೆ. ಗೀತೆಯ ಸಾರವನ್ನು ಅರಿತು ನಮ್ಮಲ್ಲಿನ ಅಜ್ಞಾನದ ಕೊಳೆಯನ್ನು ತೊಳೆದು ಭಗವಂತನ ಶುದ್ಧಿಯನ್ನು ಜೀವನದಲ್ಲಿ ಅಳವಡಿಸಿದಲ್ಲಿ ಗೊಂದಲ, ಸಂದಿಗ್ಧತೆ, ಜಿಗುಪ್ಸೆಗಳು ದೂರವಾಗಬಲ್ಲುದು. ಮಾನಸಿಕ ಸಿದ್ಧತೆಯೊಂದಿಗೆ ಜೀವನದ ಗುರಿ ಹಾಗೂ ಅರ್ಥವನ್ನು ತಿಳಿದಾಗ ಜೀವನ ಪರಿಪೂರ್ಣ ಹಾಗೂ ಸಾರ್ಥಕವಾಗುವುದು.

✍. ಕಾನತ್ತಿಲ್ ರಾಣಿ ಅರುಣ್

“ಆಜಾದ್ ಹೀ ರಹೇ ಹೆ ಹಮ್, ಆಜಾದ್ ಹೀ ರಹೇಂಗೆ!” ‌

“ಆಜಾದ್ ಹೀ ರಹೇ ಹೆ ಹಮ್, ಆಜಾದ್ ಹೀ ರಹೇಂಗೆ!” ‌
ಅಜಾದ್ ಎಂಬ ಹೆಸರಿಗೆ ಅರ್ಥ ಕೊಟ್ಟ ಅಪ್ರತಿಮ ಹೋರಾಟಗಾರ; “ಚಂದ್ರಶೇಖರ್ ಆಜಾದ್”

ಪ್ರಚಂಡ ರಣ ಪರಾಕ್ರಮಿ, ಧ್ಯೇಯಜೀವಿ, ಸಾಹಸಿ, ಧೀರೋದಾತ್ತ ಕ್ರಾಂತಿಪುರುಷನಾಗಿ ಸ್ವಾತಂತ್ರ್ಯಯಜ್ಞದಲ್ಲಿ ಪೂರ್ಣಾಹುತಿಯಾದ ರಾಷ್ಟ್ರಭಕ್ತ ಚಂದ್ರಶೇಖರ ಅಜಾದ್, ದೇಶಪ್ರೇಮಿ ಸ್ವಾಭಿಮಾನಿಗಳ ನೆಚ್ಚಿನ ಬಂಟ.
1857ರ ಭಾರತೀಯ ಸ್ವಾತಂತ್ರ್ಯ ಸಂಗ್ರಾಮದ ನಂತರ ಬ್ರಿಟಿಷ್ ಆಡಳಿತದ ವಿರುದ್ಧದ ತಮ್ಮ ಸ್ವಾತಂತ್ರ್ಯಕ್ಕಾಗಿನ ಹೋರಾಟದಲ್ಲಿ ಆಯುಧಗಳನ್ನು ಬಳಸಿದ್ದ ಮೊದಲ ಭಾರತೀಯ ಕ್ರಾಂತಿಕಾರಿಗಳಲ್ಲಿ ಚಂದ್ರಶೇಖರ್ ಆಜಾದ್ ಒಬ್ಬರಾಗಿದ್ದರು. ಓರ್ವ ಯೋಧ ಎಂದಿಗೂ ಶಸ್ತ್ರವನ್ನು ತ್ಯಜಿಸಲಾರನೆಂಬುದು ಕೂಡಾ ಚಂದ್ರಶೇಖರ್ ಆಜಾದ್ ಅಭಿಪ್ರಾಯವಾಗಿತ್ತು. ಅಂಗ್ಲರಿಗೆ ಸಿಂಹ ಸ್ವಪ್ನರಂತೆ ಕಾಡಿದವರು ಅಜೇಯ ಕ್ರಾಂತಿಕಾರಿ ಚಂದ್ರಶೇಖರ್ ಆಜಾದ್. ‌
ಪಂಡಿತ್‌ಜಿ ಎಂದು ಆಗ್ಗಾಗ್ಗೆ ಕರೆಯಲ್ಪಡುತ್ತಿದ್ದ ಆಜಾದ್‌‌ರವರು ಭಾರತೀಯ ಸ್ವಾತಂತ್ರ್ಯ ಸಂಗ್ರಾಮದ ಓರ್ವ ಕ್ರಾಂತಿಕಾರಿಯಾಗಿದ್ದರು. ಮಧ್ಯಪ್ರದೇಶದ ಅಲಿರಾಜಪುರ ಜಿಲ್ಲೆಯ ಭಾವರಾ ಎಂಬ ಸ್ಥಳದಲ್ಲಿ, ಪಂಡಿತ ಸೀತಾರಾಮ್ ತಿವಾರಿ ಮತ್ತು ಜಗರಾಣಿ ದೇವಿಯವರ ಎರಡನೆಯ ಮಗನಾಗಿ ಜನಿಸಿದ ಚಂದ್ರಶೇಖರ್, ಭಾವರಾ ಮತ್ತು ವಾರಾಣಸಿಯ ಸಂಸ್ಕೃತ ಪಾಠಶಾಲೆಯಲ್ಲಿ ವಿದ್ಯಾಭ್ಯಾಸ ಮಾಡಿದರು. ವಿದ್ಯಾರ್ಥಿದೆಸೆಯಲ್ಲಿಯೇ ಮಹಾತ್ಮಾ ಗಾಂಧಿಯವರ ಮೋಡಿಗೊಳಗಾಗಿ ಕಾಂಗ್ರೆಸ್ ಮೂಲಕ ಸ್ವಾತಂತ್ರ್ಯ ಹೋರಾಟದಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡರು.
ಅಸಹಕಾರ ಚಳುವಳಿಯಲ್ಲಿ ಭಾಗವಹಿಸಿದ ಕಾರಣದಿಂದಾಗಿ ಕೇವಲ ೧೪ರ ವಯಸ್ಸಿನಲ್ಲೇ ಛಡಿ ಏಟಿನ ಕ್ರೂರ ಶಿಕ್ಷೆಗೆ ಒಳಗಾದ ಚಂದ್ರಶೇಖರ, ನಂತರದ ಬೆಳವಣಿಗೆಗಳಲ್ಲಿ ಗಾಂಧೀಜಿಯವರ ನಿರ್ಣಯಗಳಿಂದ ಬೇಸತ್ತು ಕ್ರಾಂತಿಮಾರ್ಗವನ್ನು ಹಿಡಿದರು. ರಾಮ್‌ಪ್ರಸಾದ್ ಬಿಸ್ಮಿಲ್ಲರನ್ನು ತಮ್ಮ ಗುರುಗಳೆಂದು ಸ್ವೀಕರಿಸಿ, ತಮಗೆ ಆಝಾದ್ (ಸ್ವತಂತ್ರ) ಎನ್ನುವ ಹೆಸರನ್ನು ಸೇರಿಸಿಕೊಂಡರು. ಹದಿನೈದನೇ ವಯಸ್ಸಿಗೇ ತಮ್ಮ ಮೊದಲ ಶಿಕ್ಷೆಯನ್ನು ಪಡೆದರು ಚಂದ್ರಶೆಖರ್‌ ಅಜಾದ್. ಕ್ರಾಂತಿಕಾರಕ ಚಟುವಟಿಕೆಗಳಲ್ಲಿ ಭಾಗವಹಿಸಿದ್ದ ಅಜಾದ್‌ರನ್ನು ಪೊಲೀಸರು ಬಂಧಿಸಿ ಮ್ಯಾಜಿಸ್ಟ್ರೇಟ್ ಮುಂದೆ ಹಾಜರುಪಡಿಸಿದರು. ಮ್ಯಾಜಿಸ್ಟ್ರೇಟ್ ಹೆಸರು ಕೇಳಿದಾಗ, ‘ಅಜಾದ್’ ಎಂದು ಹೇಳುವ ಮೂಲಕ ಹದಿನೈದು ಛಡಿಯೇಟಿನ ಶಿಕ್ಷೆ ಅನುಭವಿಸಿದರು. ಪ್ರತಿಯೊಂದು ಹೊಡೆತಕ್ಕೂ ‘ಭಾರತ್ ಮಾತಾ ಕಿ ಜೈ, ಗಾಂಧಿ ಕಿ ಜೈ’ ಎನ್ನುವ ಘೋಷಣೆ ಕೂಗಿದರು. ಆ ಮೂಲಕ ಚಂದ್ರ ಶೇಖರ್ ‘ಅಜಾದ್’ ಎಂದೇ ಹೆಸರಾದರು.
ಹಿಂದೂಸ್ತಾನ್‌‌ ಸೋಷಲಿಸ್ಟ್‌‌ ರಿಪಬ್ಲಿಕನ್‌ ಅಸೋಸಿಯೇಷನ್‌ ಎಂಬ ಸಂಘವನ್ನು ಆರಂಭಿಸಿದ ಅಜಾದ್ ಅವರ ಜತೆಗೆ ಭಗತ್ ಸಿಂಗ್, ಸುಖ್ ದೇವ್, ಬಟುಕೇಶ್ವರ್ ದತ್, ರಾಜ್ ಗುರು ಸಾಥ್ ನೀಡಿದರು. ೧೯೨೫ರ ಕಾಕೋರಿ ರೈಲು ಡಕಾಯತಿಯಲ್ಲಿ ಭಾಗವಹಿಸಿದ ಆಝಾದ್, ಆ ಮೊಕದ್ದಮೆಯಲ್ಲಿ ೯ ಆರೋಪಿಗಳಲ್ಲಿ ಪೊಲೀಸರ ಕೈಗೆ ಸಿಕ್ಕಿಬೀಳದ ಏಕೈಕ ಕ್ರಾಂತಿಕಾರಿಯಾದರು. ಬಿಸ್ಮಿಲ್ಲರ ಬಂಧನದ ನಂತರ ಕ್ರಾಂತಿ ಸಂಘಟನೆಯ ಚುಕ್ಕಾಣಿಯನ್ನು ಹಿಡಿದು ಭಾರತಮಾತೆಯ ಸೇವೆಯನ್ನು ಮುಂದುವರಿಸಿದ ಆಝಾದ್, ಮುಂದಿನ ಕೆಲವರ್ಷಗಳಲ್ಲಿ ಭಾರತೀಯ ಸ್ವಾತಂತ್ರಸಂಗ್ರಾಮದಲ್ಲಿ ಸಂಪೂರ್ಣವಾಗಿ ಮುಳುಗಿದರು.. ೧೯೨೮ ರಲ್ಲಿ ಭಾರತಕ್ಕೆ ಆಗಮಿಸಿದ ಸೈಮನ್ ಕಮಿಷನ್ ವಿರುದ್ಧ ಪ್ರತಿಭಟಿಸುವ ವೇಳೆ ಶ್ರೀಯುತ ಲಾಲಾ ಲಜಪತರಾಯರ ಮೇಲಾದ ಕ್ರೂರ ದಬ್ಬಾಳಿಕೆಗೆ ಉತ್ತರವಾಗಿ ಆಝಾದರ ನೇತೃತ್ವದಲ್ಲಿ ಭಗತ್ ಸಿಂಗ್ ಹಾಗೂ ರಾಜಗುರು ಬ್ರಿಟಿಷ್ ಪೋಲೀಸ್ ಅಧಿಕಾರಿ ಜಾನ್ ಸೌಂಡರ್ಸ್ ರನ್ನು ಹತ್ಯೆಗೈದರು. ತಮಗೆ ಸಿಂಹಸ್ವಪ್ನವಾಗಿದ್ದ ಚಂದ್ರಶೇಖರ್ ಅಜಾದ್‌ರನ್ನು ಪೊಲೀಸರಿಗೆ ಬೇಕಾದವರ ಬಹುಮುಖ್ಯರ ಪಟ್ಟಿಯಲ್ಲಿ ಸೇರಿಸಿ ಬ್ರಿಟಿಷರು, ಜೀವಂತವಾಗಿ ಅಥವಾ ಕೊಂದಾದರೂ ಸರಿ ಅವರನ್ನು ಬಂಧಿಸುವ ಕಾರ್ಯಕ್ಕೆ ಕೈ ಹಾಕಿದರು.
ಅಂದು 1931 ರ ಫೆಬ್ರವರಿ 27 ರಂದು ಅಜಾದ್ ಒಬ್ಬರನ್ನು ಭೇಟಿ ಮಾಡಲು ಅಲಹಾಬಾದಿನ ಆಲ್ಫ್ರೆಡ್ ಪಾರ್ಕಿನ ಕಡೆ ಹೊರಟ. ಈ ವಿಷಯವನ್ನು ವೀರಭದ್ರ ತಿವಾರಿ ಎಂಬ ದೇಶದ್ರೋಹಿ ಪೊಲೀಸರಿಗೆ ತಿಳಿಸಿದ. ಎಂಬತ್ತು ಮಂದಿ ಪೊಲೀಸರು ಪಾರ್ಕ್ ಸುತ್ತ ಸುತ್ತುವರೆದರು. ಕಾರಿನಲ್ಲಿ ಬಂದ ನಾಟಬಾಪರ್ ಎಂಬ ಅಧಿಕಾರಿ ಆಜಾದ್ ತೊಡೆಗೆ ಗುರಿಯಿಟ್ಟು ಹೊಡೆದ. ಆ ಗುಂಡು ಆಜಾದ್’ಗೆ ತಾಕಿತು. ಅಪಾಯದ ಅರಿವಾದ ಕೂಡಲೇ ಆಜಾದ್ ತನ್ನ ಸ್ನೇಹಿತನನ್ನು ರಕ್ಷಿಸಿ ಹೋರಾಟಕ್ಕೆ ಸಜ್ಜಾದ. ಕೈಯಲ್ಲಿ ಬಂದೂಕು ಹಿಡಿದು ಒಂದೇ ಸಮನೆ ಗುಂಡು ಹಾರಿಸಿದ. 80 ಪೊಲೀಸರು ಮತ್ತು ಒಬ್ಬ ಆಜಾದ್. ಆಜಾದ್ ಚಿರತೆಯಂತೆ ಓಡಾಡುತ್ತಾ ಪೊಲೀಸರಿಗೆ ತಕ್ಕ ಉತ್ತರ ನೀಡಿದ. ಅರ್ಧ ಗಂಟೆಗೂ ಹೆಚ್ಚು ಕಾಲ ಯುದ್ದ ಮಾಡಿದ ಆಜಾದ್’ಗೆ ತನ್ನ ಬಳಿಯಿರುವ ಗುಂಡಿನ ಲೆಕ್ಕವಿತ್ತು. ಕೊನೆಯ ಗುಂಡು ಉಳಿದಿತ್ತು. ಜೀವಂತವಾಗಿ ಪೋಲೀಸರ ಕೈಗೆ ಸಿಗಬಾರದೆಂದು ನಿರ್ಧರಿಸಿದ್ದ ಆಜಾದ್ ಆ ಒಂದು ಗುಂಡನ್ನು ತಲೆಗೆ ಹೊಡೆದುಕೊಂಡು ಸೇನಾನಿಯಂತೆ ತನ್ನ ತಾಯಿ ಭಾರತಿಗೆ ಕುಸುಮದಂತೆ ತನ್ನ ಪ್ರಾಣವನ್ನು ಅರ್ಪಿಸಿದ. ಅಂದು ಆಲ್ ಫ್ರೆಡ್ ಉದ್ಯಾನವನದಲ್ಲಿ ಅಂತಿಮ ಕ್ಷಣ ಎದುರಿಸುವಾಗಲೂ ಅಜಾದ್ ಶರಣಾಗಲಿಲ್ಲ. ತಮ್ಮನ್ನು ಜೀವಂತವಾಗಿ ಯಾರೂ ಸೆರೆಹಿಡಿಯಲಾರರೆಂಬ ತಮ್ಮ ಪ್ರತಿಜ್ಞೆಯನ್ನು ಕಾಪಾಡಿಕೊಂಡರು.
ಚಂದ್ರಶೇಖರ್ ಆಜಾದ್ ಅಥವಾ ‘ಆಜಾದ್’ ಎಂಬ ಹೆಸರು ಭಾರತೀಯ ಸ್ವಾತಂತ್ರ್ಯ ಸಂಗ್ರಾಮದಲ್ಲಿ ಅಜರಾಮರ. ಭಗತ್ ಸಿಂಗ್ ರನ್ನು ಮಾರ್ಗದರ್ಶಕರನ್ನಾಗಿಸಿಕೊಂಡು ಕ್ರಾಂತಿಕಾರಿಯಾಗಿ ಸ್ವಾತಂತ್ರ್ಯ ಸಂಗ್ರಾಮ ನಡೆಸಿದ ಚಂದ್ರಶೇಖರ ಸೀತಾರಮ್ ತಿವಾರಿ ಅಲಿಯಾಸ್ ಆಜಾದ್ ಅವರ ಸಂಸ್ಮರಣಾ ದಿನವನ್ನು ದೇಶದೆಲ್ಲಡೆ ಸ್ಮರಿಸಲಾಗುತ್ತಿದೆ. ನಂಬಿಕಸ್ತರ ವಂಚನೆಯಿಂದಲೇ ಅಂದು ಆಜಾದ್ ಬಲಿದಾನವಾಯಿತು. ಅವರು ಸಾಯುತ್ತಿರುವುದನ್ನು ನೋಡಿದರೂ ಅವರ ಮೃತದೇಹದ ಬಳಿಗೆ ಸುಮಾರು ಎರಡು ಗಂಟೆಗಳ ಕಾಲ ಯಾವುದೇ ಬ್ರಿಟಿಷ್ ಸೈನಿಕನೂ ಹೋಗಲಿಲ್ಲವೆಂದು ಹೇಳಲಾಗುತ್ತದೆ. ಆಜಾದ್ ಎಂಬ ಬಹುರೂಪಿ ಯಾವ ರೀತಿ ಬ್ರಿಟಿಷರಿಗೆ ಭಯ ಹುಟ್ಟಿಸಿದ್ದರು ಎಂಬುದನ್ನು ಕಾಣಬಹುದು.
ನಮಗಾಗಿ ಆಜಾದ್ ಅವರು ಮಾಡಿದ ತ್ಯಾಗ, ಬಲಿದಾನವನ್ನು ಸ್ಮರಿಸುವ ದಿನ ಫೆಬ್ರವರಿ 27. ಇಂಥ ಹೀರೋಗಳು ಮತ್ತೆ ಹುಟ್ಟಿ ಬರಲಿ. ಚಂದ್ರಶೇಖರ ಆಜಾದ್ ತ್ಯಾಗ ಬಲಿದಾನವನ್ನು ಸ್ಮರಿಸೋಣ, ಅವರ ಮಹಾನ್ ವ್ಯಕ್ತಿತ್ವ ನೆನೆದಾಗಲೆಲ್ಲಾ ದೇಶಭಕ್ತಿಯನ್ನು ಪ್ರಜ್ವಲಿಸುವ ಅಮರ ಜ್ಯೋತಿಯ ಉದ್ದೀಪನವಾದಂತೆನಿಸುತ್ತದೆ. ಅವರ ಬದುಕಿನಲ್ಲಿ ಜಾಗೃತವಾಗಿದ್ದ ಸುಸಂಸ್ಕೃತ ನಡಾವಳಿ, ಹಿರಿಯರ ಬಗ್ಗೆ ಗೌರವ, ದೇಶಕ್ಕಾಗಿ ಏನನ್ನೂ ಮಾಡಲು ಸಿದ್ಧರಿದ್ಧ ಭಕ್ತಿನಿಷ್ಠೆಗಳು ನಿರಂತರ ಮನನಯೋಗ್ಯವಾಗಿವೆ. ಆ ಮಹಾನ್ ರಾಷ್ಟ್ರಯೋಧರ ಚೇತನಕ್ಕೆ ಶಿರಬಾಗಿ ನಮಿಸೋಣ.

✍. ಕಾನತ್ತಿಲ್ ರಾಣಿ ಅರುಣ್

ಶಿವನು ಸತ್ಯವನ್ನರಿತ ದಿನ ಶಿವರಾತ್ರಿ! ಶಿವರಾತ್ರಿ ಪ್ರಯುಕ್ತ ವಿಶೇಷ ಲೇಖನ

“ಶಿವನು ಸತ್ಯವನ್ನರಿತ ದಿನ ಶಿವರಾತ್ರಿ”

ಶಿವರಾತ್ರಿ ಪ್ರಯುಕ್ತ ವಿಶೇಷ ಲೇಖನ

ಶಿವರಾತ್ರಿಯನ್ನು ಮಾಘ ಮಾಸದ ಬಹುಳ ಚತುರ್ದಶಿಯಂದು ಆಚರಿಸುತ್ತಾರೆ. ಶಿವರಾತ್ರಿ ಹಬ್ಬವೆಂದರೆ ಹಿಂದೂಗಳಿಗೆ ವಿಶೇಷವಾದ ಹಬ್ಬವೆಂದೆ ಹೇಳಬೇಕು. ಈ ದಿನದಂದೆ ಶಿವನು ಪಾರ್ವತಿಯನ್ನು ಮದುವೆಯಾಗಿದ್ದು ಎಂದೂ, ಭಕ್ತರ ಇಷ್ಟಾರ್ಥಗಳನ್ನು ಪೂರೈಸಲು ಶಿವನು ಭೂಮಿಗಿಳಿದು ಬರುತ್ತಾನೆ ಎಂಬುದಾಗಿಯೂ, ಶಿವನು ಲಿಂಗಧಾರಣೆ ಮಾಡಿದ ದಿನವೆಂದೂ, ಶಿವ ತಾಂಡವ ನೃತ್ಯ ಮಾಡಿದ ದಿನವೆಂದೂ, ಭಗೀರತನು ಶಿವನನ್ನು ಮೆಚ್ಚಿಸಿ ಗಂಗೆಯನ್ನು ಶಿವನ ಜಟೆಯಿಂದ ಭೂಮಿಗಿಳಿಸಿ ತನ್ನ ಮುತಾತಂದಿರಿಗೆ ಸ್ವರ್ಗವನ್ನು ಕಲ್ಪಿಸಿದ ದಿನವೆಂದೂ, ಸಮುದ್ರ ಮಥಂನದ ಸಮಯದಲ್ಲಿ ದೇವತೆಗಳು ಮತ್ತು ರಾಕ್ಷಸರು ಹಾಲಾಹಲ ಎಂಬ ವಿಷ ಉತ್ಪತಿಯಾದಾಗ ಶಿವನು ಆ ವಿಷವನ್ನು ಕುಡಿಯಲು ಪಾರ್ವತಿ ಶಿವನ ಗಂಟಲನ್ನು ಹಿಡಿದುಕೊಂಡು ರಾತ್ರಿಯಿಡೀ ಕಳೆದುದರ ಸಂಕೇತವೆಂದೂ, ಹೀಗೆ ಅನೇಕ ಉಪ ಕಥೆಗಳು ಶಿವರಾತ್ರಿ ದಿನದ ವಿಶೇಷವಾಗಿದೆ.
ಚಳಿಗಾಲವು ಕಳೆದು ಸುಡು ಬೇಸಿಗೆ ಪ್ರಾರಂಭವಾಗುವ ಸಮಯ (ಫೆಬ್ರವರಿ-ಮಾರ್ಚ್) ತಿಂಗಳಲ್ಲಿ ಬರುವ ಹಬ್ಬವೆ ಶಿವರಾತ್ರಿ. ಶಿವ ಎಂದರೆ ಶುಭಕರ ಅಥವಾ ಮಂಗಳಕರ ಎಂದಾದರೆ, ರಾತ್ರಿ ಎಂಬುದು ಹಗಲಿಗೆ ವಿರುದ್ಧವಾದ ಇರುಳು ಎಂದರ್ಥ. ಆದ್ದರಿಂದ ಶಿವರಾತ್ರಿ ಎಂಬುದು ಮಂಗಳಕರವಾದ ರಾತ್ರಿಯೆಂದೂ ಹೇಳುತ್ತಾರೆ. ಶಿವನು ನಿದ್ರೆ ಮಾಡುವ ರಾತ್ರಿಯೆಂದೂ ಹೇಳುವವರಿದ್ದಾರೆ. ಇದರಲ್ಲಿ ಬ್ರಹ್ಮ ಮತ್ತು ವಿಷ್ಣು ಇಬ್ಬರು ತಾನು ಮೇಲು ಎಂದು ವಾದ ಮಾಡುತ್ತಾರೆಂದೂ, ಅದನ್ನು ಪರಿಹರಿಸಲು ಇಬ್ಬರು ಶಿವನ ಬಳಿ ಬಂದು ನಮ್ಮಿಬ್ಬರಲ್ಲಿ ಯಾರು ಶ್ರೇಷ್ಟರು ಎಂದು ಕೇಳಲು ಶಿವನು ಇವರ ಅಹಂಕಾರವನ್ನು ಮುರಿಯಲು ನನ್ನ ಮೊದಲು ಮತ್ತು ಕೊನೆಯನ್ನು ಹುಡುಕಿಕೊಂಡು ಬನ್ನಿ ಎಂದು ಕಳುಹಿಸಿದ. ಆಗ ಬ್ರಹ್ಮನು ಲಿಂಗದ ಆಳವನ್ನು ಹುಡುಕಲು ವಿಫಲನಾಗಿ ಕೇದಗಿ ಹೂವಿನ ಸಹಾಯ ಪಡೆದು ನಾನು ಶಿವನ ಲಿಂಗದ ಆಳವನ್ನು ಕಂಡಿರುವುದಾಗಿ ಸುಳ್ಳು ಹೇಳಿ ಕೊನೆಗೆ ಸಿಕ್ಕಿಬಿದ್ದ. ಹಾಗಾಗಿ ಶಿವನು ಬ್ರಹ್ಮನ ಪೂಜೆ ಮಾಡುವವರಿಗೆ ಅಕಾಲಿಕ ಮರಣ ಉಂಟಾಗುವುದೆಂದೂ, ಕೇದಗಿ ಹೂವನ್ನು ಯಾರೂ ಪೂಜೆಗೆ ಬಳಸ ಬಾರದೆಂದೂ ಶಾಪ ನೀಡಿದುದಾಗಿಯೂ ಒಂದು ಕಥೆಯಿದೆ.
ಶಿವರಾತ್ರಿಯು ಶಿವನಿಗೆ ಪ್ರಿಯವಾದ ದಿನವಾಗಿದ್ದು, ಅಂದು “ಯಾರು ಸರಳ, ನಿಷ್ಕಲ್ಮಷ ಮನಸ್ಸಿನಿಂದ ನನ್ನನ್ನು ಪೂಜಿಸುತ್ತಾರೋ ಅವರಿಗೆ ನಾನು ಅವರ ಇಷ್ಟಾರ್ಥಗಳನ್ನು ಪೂರೈಸುವುದಾಗಿ” ಶಿವನು ಪಾರ್ವತಿಗೆ ಹೇಳುವುದಾಗಿ ಶಿವ ಪುರಾಣದಲ್ಲಿ ತಿಳಿಸಲಾಗಿದೆ. ಶಿವರಾತ್ರಿಯಂದು ಉಪವಾಸ, ವ್ರತ, ಪೂಜೆ, ಧ್ಯಾನಾದಿಗಳಿಂದ ಶಿವನನ್ನು ಪೂಜಿಸುವುದರಿಂದ ಮನುಷ್ಯ ಜೀವನದಲ್ಲಿ ಮಾಡಿದ ಪಾಪಗಳೆಲ್ಲವೂ ಪರಿಹಾರವಾಗಿ ಮೋಕ್ಷ ಪ್ರಾಪ್ತವಾಗುತ್ತದೆಂದು ಹಿಂದುಗಳ ನಂಬಿಕೆಯಾಗಿದೆ. ಒಂದೆಡೆ ವಿವಾಹವಾಗದ ಹೆಣ್ಣುಮಕ್ಕಳು ಶಿವರಾತ್ರಿಯಂದು ಜಾಗರಣೆ, ಪೂಜೆಯನ್ನು ಮಾಡುವುದರಿಂದ ಶಿವನಂತಹ ಪತಿ ದೊರೆಯುವುದೆಂದೂ, ವಿವಾಹವಾದ ಪತ್ನಿಯರು ಪೂಜಿಸುವುದರಿಂದ ತನ್ನ ಪತಿಗೆ ಅಷ್ಟಐಶ್ವರ್ಯಗಳು ಲಭಿಸುವುದೆಂದೂ ನಂಬುತ್ತಾರೆ.

ಶಿವರಾತ್ರಿಯ ಬಗ್ಗೆಗಿನ ಒಂದು ರೋಚಕ ಕಥೆ:

‘ಶಿವನು ಸ್ವಯಂಭೂ’ ಏಕೆಂದರೆ ಅವನ ಸೃಷ್ಠಿಗೆ ನಿರ್ಧಿಷ್ಟವಾದ ಕ್ಷಣವಾಗಲಿ, ನಿರ್ಧಿಷ್ಟವಾದ ಮೂಲವಾಗಲಿ ಇಲ್ಲ. ಅವನು ತಾನಾಗೀಯೇ ಇದ್ದಾನೆ. ಶಿವ ಅನ್ನುವ ಪದದ ಅರ್ಥ ಏನೂ ಅಲ್ಲದೂ ಅಂತ. ಎನೂ ಅಲ್ಲದೂ ಒಂದು ನಿಗದಿತ ಸಮಯದಲ್ಲಾಗಲ್ಲಿ ಯಾವದರ ಮೂಲಕದಲ್ಲೂ ಸಂಭವಿಸಲ್ಲ ಅದು ಇದೆ ಅಷ್ಟೇ ಹಾಗಾಗಿ ಶಿವ ಇದ್ದ.
ಸೃಷ್ಠಿಕರ್ತ ಬ್ರಹ್ಮ ಸೃಷ್ಠಿಸಲು ಆರಂಭಿಸಿದ. ವಿವಧ ನಕ್ಷತ್ರ ಪುಂಜಗಳು, ಗ್ರಹಗಳು, ಜೀವಜಾತಿಗಳು, ಮನುಷ್ಯರು ಎಲ್ಲವೂ ಅವನಿಂದ ಹೊರಬಂತು. ಆಗ ನಿಶ್ಚಲವಾಗಿದ್ದ ಶಿವನು ತನ್ನ ಕಣ್ಣನ್ನು ತೆರದು ಸೃಷ್ಠಿಯನ್ನು ಗಮನಿಸಲು ಪ್ರಾರಂಭಿಸಿದ. ಅವನು ಸೃಷ್ಠಿಯನ್ನು ಅವಲೋಕಿಸುತ್ತಿದ್ದಂತೆ. ಆನ ಇಲ್ಲಾ ರೀತಿಯ ಕಷ್ಟ-ಕಾರ್ಪಣ್ಯ, ನೋವು ದುಃಖ ಸಂಕಟಗಳನ್ನು ಅನುಭವಿಸುತ್ತಿರುವುದು ನೋಡಿದ. ಅಲ್ಲೊಮ್ಮೆ ಇಲ್ಲೊಮ್ಮೆ ಸ್ವಲ್ಪ ಸುಖ ಸಂತೋಷ ಇತ್ತು ಅಷ್ಟೇ. ಶಿವ ಇದನ್ನು ನೋಡಿದಾಗ ಅವನಿಗೆ ಸೃಷ್ಠಿ ಇಷ್ಟವಾಗಲಿಲ್ಲ. ಅವನೂ ಸುತ್ತಲೂ ನೋಡಿದಾಗ ಬ್ರಹ್ಮ ತನ್ನ ಸೃಷ್ಠಿಯ ಬಗ್ಗೆ ಬಹಳ ಹೆಮ್ಮೆಪಡುತ್ತಿರುವುದು ಕಾಣಿಸುತ್ತದೆ.
ಬೃಹ್ಮನು ತನ್ನ ಸೃಷ್ಠಿಯನ್ನು ತುಂಬ ಗರ್ವ ಮತ್ತು ಆನಂದದಿಂದ ನೋಡುತ್ತಿದ್ದ. ತನ್ನ ಸೃಷ್ಠಿಯನ್ನು ನೋಡಲು ಬ್ರಹ್ಮ ಎರಡು ಕಣ್ಣು ಸಾಲದು ಎಂದು ಅನ್ನಿಸಿ ಇನ್ನೋಂದು ತಲೆಯನ್ನು ಹುಟ್ಟಿಸಿದ. ಹಾಗೇ ಸುತ್ತಲೂ ನೋಡಲು ನಾಲ್ಕು ಬದಿಯಲ್ಲಿ ನಾಲ್ಕು ತಲೆಗಳನ್ನು ಹುಟ್ಟಿಸಿಕೊಂಡ. ಬ್ರಹ್ಮನಿಗೆ ಅದೂ ಸಾಲದೆಂಬಂತೆ ಐದನೆ ತಲೆಯನ್ನು ಹುಟ್ಟಿಸಿದ. ಈ ಐದನೆ ತಲೆ ಏನನ್ನೂ ನೋಡಬೇಕುಂತ ಅಲ್ಲ. ತನ್ನ ಗರ್ವಕ್ಕಾಗಿ ಸುಮ್ಮನೆ ಹುಟ್ಟಿಸಿದ. ಬ್ರಹ್ಮ ಇಂತಹ ದರಿದ್ರವಾದ ಸೃಷ್ಠಿಯನ್ನು ನೋಡಿ ಹಿಗ್ಗುತ್ತಿರುವುದನ್ನು ಕಂಡ ಶಿವನಿಗೆ ಕೋಪ ಬಂತು. ಅವನು ಬ್ರಹ್ಮನ ಮೇಲೆ ದಾಳಿ ಮಾಡಿ ಅವನ ಐದನೆ ತಲೆಯನ್ನು ಕಿತ್ತು ಹಾಕಿದ.
ಬ್ರಹ್ಮನಿಗೆ ಈಗಿರುವುದು ನಾಲ್ಕೆ ತಲೆಗಳು. ಬ್ರಹ್ಮ ನೋವಿನಿಂದ ಚೀರಿ “ಹೀಗೆ ಹ್ಯಾಕೆ ಮಾಡುತ್ತಿದ್ದಿಯಾ ಅಂತ ಕೇಳಿದ” ಅದಕ್ಕೆ ಶಿವ “ನಿನ್ನ ಸೃಷ್ಠಿ ಬಗ್ಗೆ ನಿನಗೆ ನಾಚಿಕೆಯಾಗಲ್ಲವಾ… ಎಲ್ಲರೂ ದುಃಖ ಪಡುತ್ತಿದ್ದಾರೆ. ಜನ ಎಲ್ಲಾ ತರಹದ ನೋವು ನರಳಾಟ ಮತ್ತು ಸಂಕಟವನ್ನು ಅನುಭವಿಸುತ್ತಿದ್ದಾರೆ” ಅಂದ.
ಬ್ರಹ್ಮ ಹೇಳಿದ: ನಾನು ನೋವನ್ನು ಸೃಷ್ಠಿಸಲಿಲ್ಲ, ನಲಿವನ್ನು ಸೃಷ್ಠಿಸಲಿಲ್ಲ. ನಾನು ಸೃಷ್ಠಿಸಿದ್ದಿನಿ ಅಷ್ಟೇ. ಜನ ಹೇಗೆ ಜೀವಿಸುತ್ತಾರೆ ಎಂಬುದು ಅವರಿಗೆ ಬಿಟ್ಟಿದ್ದು. ಅದಿರುವುದು ಅವರ ಮನಸ್ಸಿನಲ್ಲಿ.
ಶಿವ ಅಂದ: ಮನಸ್ಸನ್ನು ಸೃಷ್ಠಿಸಿದ್ದು ಯಾರು? ಅದೂ ನಿನ್ನದೆ ಸೃಷ್ಠಿ.
ಬ್ರಹ್ಮ ಅಂದ: ಮನಸ್ಸಿಗೆ ತನ್ನದೆ ಆದ ಗುಣ ಲಕ್ಷಣಗಳಿಲ್ಲ ಅದು ಇದೆ ಅಷ್ಟೆ. ಜನ ಅದರಿಂದ ಸಂತೋಷವನ್ನು ಮಾಡ್ಕೋಬಹುದು ಅಥವಾ ದುಃಖವನ್ನು ಮಾಡ್ಕೋಬಹುದು ಅಥವಾ ಪರಮಾನಂದವನ್ನು ಮಾಡ್ಕೋಬಹುದು. ಅದು ಅವರಿಗೆ ಬಿಟ್ಟಿದ್ದು.
ಇದನ್ನು ಕೇಳಿ ಶಿವನು ಕೂತು ಸೃಷ್ಠಿಯನ್ನು ಗಹನವಾಗಿ ಅವಲೋಕಿಸಿದ. ಎಲ್ಲಾ ಜೀವಿಗಳನ್ನು ಗಮನಿಸಿದ. ಆ ಮೇಲೆ ಅವನಿಗೆ ತನ್ನದೆ ಮನಸ್ಸನ್ನು ತಿಲ್ಕೋಬೇಕಿತ್ತು. ಹಾಗಾಗಿ ಕಣ್ಣು ಮುಚ್ಚಿ ಕೂತು ತನ್ನದೇ ಸ್ವರೂಪವನ್ನ ತನ್ನ ಮನಸ್ಸಿನ ಸ್ವರೂಪವನ್ನ ನೋಡ ತೊಡಗಿದ. ಅವನಿಗೆ ಮನವರಿಕೆಯಾಯಿತು. ವಾಸ್ತವತೆಯಲ್ಲಿ ಸೃಷ್ಠಿಗೆ ಗುಣ ಲಕ್ಷಣವಿಲ್ಲ. ಪ್ರತಿಯೊಬ್ಬರು ತಮಗೆ ಬೇಕುವುದನ್ನ ಸೃಜಿಸಬಹುದು. ಮನಸ್ಸಿಗೂ ಲಕ್ಷಣ ರಹಿತವಾದದ್ದು ಎಂದು ಅವನಿಗೆ ಮನವರಿಕೆಯಾದಗ ಈ ಸಾಕ್ಷಾತ್ಕಾರ ನಿಚ್ಚಲವಾದಗ ಅವನು ಭಾವೋತ್ಕರ್ಷನಾದ. ಎಷ್ಟು ಆನಂದ ಪರವಸನಾದ ಅಂದರೆ ಎದ್ದು ನಿಂತು ಕುಣಿಯೋಕೆ ಆರಂಭಿಸಿದ. ಹುಚ್ಚೆದ್ದು ಕುಣಿದ. ಅವನು ಸಂಪೂರ್ಣವಾಗಿ ತೊಡಗಿಕೊಂಡು ತೀವ್ರವಾಗಿ ಕುಣಿಯುತ್ತಿರಬೇಕಾದರೆ ಅವನ ದೇಹದ ಪ್ರತಿಯೊಂದು ಕೇಶವು ತನ್ನಲ್ಲೆ ಒಂದು ನೃತ್ಯವಾಗಿದ್ದಾಗ ಇದ್ದಕ್ಕಿದ್ದಂತೆ ಈ ನೃತ್ಯದ ಅಗತ್ಯವು ಇಲ್ಲ ಅನ್ನೋದು ಮನದಟ್ಟಾಯಿತು. ನೃತ್ಯದ ಪರಾಕಷ್ಠತೆಯಲ್ಲಿ ನಿಶ್ಚಲತೆ ಇದೆ. ಅನ್ನೋದನ್ನ ಗಮನಿಸಿದ. ಹಾಗಾಗಿ ಅವನು ತಪಸ್ವಿಯ ತರಹ ಅಚಲವಾಗಿ ಸಂಪೂರ್ಣ ಸ್ಥಬ್ದನಾಗಿ ಕೂತ. ಆ ನಿಶ್ಚಲತೆ ಮಹಾ ಶಿರಾತ್ರಿಯ ಈ ರಾತ್ರಿಯಂದು ಸಂಭವಿಸಿತು ಎಂದು ಹೇಳುತ್ತಾರೆ.
ಆಡಂಬರ ಪ್ರಿಯನಲ್ಲದ, ಮೈತುಂಬಾ ವಿಭೂತಿಯನ್ನು ಬಳಿದು, ಹುಲಿಚರ್ಮವನ್ನು ಸುತ್ತಿಕೊಂಡು, ಹಾವನ್ನು ಕೊರಳಿಗೆ ತಾಕಿಕೊಂಡು, ಸದಾ ಕಾಲವು ಧ್ಯಾನದಲ್ಲಿಯೇ ಕುಳಿತಿರುವ ಶಿವನನ್ನು ಕೇವಲ ಪಂಚಾಕ್ಷರಿ ಮಂತ್ರವಾದ ‘ಓಂ ನಮಃ ಶಿವಾಯ’ದಿಂದಲೂ ಒಲಿಸಿಕೊಳ್ಳಬಹುದೆಂದು ಋಷಿಮುನಿಗಳು ಹೇಳುತ್ತಾರೆ. ಭಕ್ತ ಮಾರ್ಕಾಂಡೆಯ, ಭಕ್ತ ಕುಂಬಾರ, ಬೇಡರ ಕಣ್ಣಪ್ಪ, ಭಕ್ತ ಸಿರಿಯಾಳ ಮುಂತಾದ ಭಕ್ತರು ಶಿವವನ್ನು ಒಲಿಸಿಕೊಂಡು ಅಮರರಾಗಿದ್ದಾರೆ. ಆದ್ದರಿಂದ ಶಿವರಾತ್ರಿಯಂದು ನಾವೂ ಶಿವನನ್ನು ಒಲಿಸಿಕೊಳ್ಳುವ ಪ್ರಯತ್ನ ಮಾಡೋಣ. ಸರ್ವರಿಗೂ ಶಿವರಾತ್ರಿ ಹಬ್ಬದ ಶುಭಾಶಯಗಳನ್ನು ಕೋರುತ್ತಾ, ಆದಿಯೋಗಿ ಶಿವನು ಸರ್ವರಿಗೂ ಸನ್ಮಂಗಳವನ್ನುಂಟು ಮಾಡಲಿ ಎಂದು ಆಶಿಸುತ್ತೇನೆ. ‘ಓಂ ನಮಃ ಶಿವಾಯ’

. ಕಾನತ್ತಿಲ್ ರಾಣಿ ಅರುಣ್

ತಾಳ್ಮೆ ಇಲ್ಲದ ನಿರ್ದೇಶಕನ ಅಸಂಗತ (ಅಭ್ಸರ್ಡ್)‌ ಸಿನೆಮಾ ಮಕ್ಕಡ ಮನಸ್ಸ್‌

ತಾಳ್ಮೆ ಇಲ್ಲದ ನಿರ್ದೇಶಕನ ಅಸಂಗತ (ಅಭ್ಸರ್ಡ್)‌ ಸಿನೆಮಾ

ಮಕ್ಕಡ ಮನಸ್ಸ್‌

ಕೊಡವ ಭಾಷಾ ಸಿನೇಮಾಗಳು ಇತ್ತೀಚೆಗೆ ಹೊಸ ಹೊಸ ಪ್ರಯೋಗದೊಂದಿಗೆ ತೆರೆಕಾಣುತ್ತಿದೆ. ಅದರಲ್ಲಿ “ಭಾವ ಬಟ್ಟೆಲ್‌” ಸಿನೆಮಾ ಪ್ರಯೋಗಕ್ಕೆ ಒಗ್ಗಿಕೊಂಡ ಮೊದಲ ಸಿನೆಮಾವಾದರೆ. ಆನಂತರದ್ದು ಶ್ರೀ ಸೋಲೋಮನ್‌ ನಿರ್ದೇಶನದ “ಮಕ್ಕಡ ಮನಸ್ಸ್‌”‌ ಎರಡು ಗಂಟೆಯ ಅವದಿಯಲ್ಲಿ ನಾಲ್ಕು ಹಾಡುಗಳಿರುವ ಸಿನೆಮಾದಲ್ಲಿ “ಹಾರೋ ಹಕ್ಕಿ ಆಗೋಣ ಬಾ” ಕನ್ನಡ ಹಾಡು ಕೇಳಲು ಇಂಪಾಗಿದೆಯಲ್ಲದೆ ಇಡೀ ಹಾಡಿನ ದೃಶ್ಯ ನೋಡುಗರನ್ನು ಹಿಡಿದಿಟ್ಟುಕೊಳ್ಳುತ್ತದೆ. ಅಂತಹ ಶಕ್ತಿ ಅ ಹಾಡಿಗೆ ಇದೆ.

ಇದೇ 03-02-2020 ರಂದು ಪೊನ್ನಂಪೇಟೆ ಕೊಡವ ಸಮಾಜದ ಕಟ್ಟಡದಲ್ಲಿ ವ್ಯವಸ್ಥಿತವಾಗಿ ಥಿಯೇಟರೀಸಿಕೊಂಡು ಪ್ರದರ್ಶನ ಕಾಣುತ್ತಿದೆ. ಥಿಯೇಟರ್ ಅಭಾವವಿರುವ ಈ ಕಾಲಗಟ್ಟದಲ್ಲಿ ಶ್ರಮಪಟ್ಟು ಮಾಡಿದ ಸಿನಿಮಾವನ್ನು ಜನರ ಬಳಿ ಕೊಂಡೂಯ್ದು ಥಿಯೇಟರ್‌ ಅನುಭವನ್ನೇ ಕೊಡಗಿಗೆ ಮೊದಲು ಪರಿಚಯಿಸಿದ್ದು “ತಳ್‌ಂಗ್ ನೀರ್”‌ ಕೊಡವ ಸಿನೆಮಾ ತಂಡ. ಈ ಸಂಚಾರಿ ಥಿಯೇಟರ್‌ನ ಉಸ್ತುವಾರಿ ಸುಲಭವೇನಲ್ಲ ಅದನ್ನ ಅನುಭವವಿಸಿದವರಿಗೇ ಗೊತ್ತು ಅದರ ಪಾಡು.

ಹಾಗೆಯೇ “ತಳ್‌ಂಗ್ ನೀರ್‌” ಮತ್ತೊಂದು ಸಂಸ್ಕೃತಿಯನ್ನು ಕೊಡಗಿಗೆ ಪರಿಚಯಿಕೊಟ್ಟು ಹೋಗಿ ತಾನು ಮಾತ್ರ ಇಲ್ಲಿನ ಸಿನಿಮಾಭಿಮಾನಿಗಳ ಮನಸ್ಸಲ್ಲಿ ಉಳಿದು ಕೊಂಡಿದೆ.

ಪ್ರತೀ ಪ್ರದರ್ಶನದ ಕೊನೆಯಲ್ಲಿ ಪ್ರೇಕ್ಷಕರೊಂದಿಗೆ ಸಂವಾದ ಕಾರ್ಯಕ್ರಮ ನಡೆಸಿಕೊಟ್ಟದ್ದು, ಇದೀಗ ತೆರೆಕಾಣುತ್ತಿರುವ ನೂತನ ಸಿನೆಮಾಗಳು ಸಂವಾದ ಸಂಸ್ಕೃತಿಯನ್ನು ಮುಂದುವರೆಸಿಕೊಂಡು ಬಂದಿವೆ.

ಕ್ರಿ.ಶ. 1830-32 ರಲ್ಲಿ ಕೊಡಗಿಗೆ ಕ್ರೈಸ್ತ ವಿದ್ಯಾಸಂಸ್ಥೆಗಳು ಅಕ್ಷರ ಕಲಿಸಲು ಮುಂದಾದವು. ಅದಕ್ಕಿಂತ ಮೊದಲು “ಕೈ ಮಠ” ಎಂಬ ಅಕ್ಷರ ದಾಸೋಹ ಚಾವಡಿಗಳು ಅಲ್ಲೊಂದು ಇಲ್ಲೊಂದು ನಡಿಯುತ್ತಿತ್ತು. ನಮ್ಮ ಹೆಮ್ಮೆಯ ಶ್ರೀ ಅಪ್ಪನೆರವಂಡ ಹರದಾಸ ಅಪ್ಪಚ್ಚ ಕವಿ ಕೂಡ “ಕೈ ಮಠ” ದಲ್ಲಿ ಅಕ್ಷರ ತಿದ್ದಿದ್ದಾರೆ.

ಆ ಸಂದರ್ಭದಲ್ಲಿ ಅಕ್ಷರ ಹಸಿವಿರುವ ಕೆಲವರು ಉಚಿತ ವಿದ್ಯಾಭ್ಯಾಸಕ್ಕಾಗಿ ಕೊರಳಿಗೆ ಶಿಲುಭೆ ಏರಿಸಿಕೊಂಡು ಅಕ್ಷರ ಕಲಿತು ಅಕ್ಷರದಿಂದ ಅನ್ನ ಸಂಪಾದಿಸಿಕೊಳ್ಲಲು ಆರಂಭಿಸಿದ ನಂತರ ಶಿಲುಭೆಯನ್ನ ಕಳಚಿಟ್ಟ ಘಟನೆ ಕೊಡಗಿನ ಚರಿತ್ರೆಯಲ್ಲಿ ನಡೆದುಹೊದದ್ದನ್ನು ಕೆಲ ಹಿರಿಯರು ಈ ಸ್ವಾರಸ್ಯಕರ ಘಟನೆಯನ್ನು ಅಲ್ಲಿ ಇಲ್ಲಿ ಹೇಳಿ ಉಳಿಸಿ ಹೋಗಿದ್ದಾರೆ.

ಕೊಡವ ಬಾಷಾ ಸಿನಿಮಾ ಎಂದಾಗಲೆ ಜನಮನದ ಮನಸ್ಸಲ್ಲಿ ಪ್ರತಿಫಲಿಸುವುದು ಕೊಡವ ನೇಟಿವಿಟಿ ಬಗ್ಗೆ “ಮಕ್ಕಡ ಮನಸ್ಸ್‌” ಸಿನಿಮಾ ಮಾತ್ರ ಹೇಳ ಹೊರಟಿರುವುದು ಒಂದು ಉತ್ತಮ ಸಂದೇಶವನ್ನು.

ಬಡತನದಲ್ಲಿ ಅಕ್ಷರ ಕಲಿಯುವ ಹಿಂದಿನ ಕಷ್ಟಗಳು, ಅಪ್ಪ ಅಮ್ಮನ ಕಷ್ಟಗಳನ್ನು ಮಕ್ಕಳ ಕಣ್ಣಿಗೆ ಸಿನಿಮಾ ಕಟ್ಟಿಕೊಡುತ್ತದೆ. ಹಾಗೆಯೇ ಸ್ನೇಹಿತರ ಸಂಬಂಧ, ಶಿಕ್ಷಕರು ಮಕ್ಕಳ ಮನಸ್ಸುಗಳನ್ನು ಅರಿತುಕೊಳ್ಳುವುದರ ಬಗ್ಗೆ ಕೂಡ ಒಳ್ಳೆಯ ಸಂದೇಶವನ್ನು ನೀಡಿದೆ.

ದೇವಯ್ಯ ಪಾತ್ರದಲ್ಲಿ ಸಿನಿಮಾದ ಹೀರೊವಾಗಿ ಉತ್ತಮ ಅಭಿನಯ ನೀಡುತ್ತಾ ಪಾತ್ರ ಮಲೆಯಾಳಮಯವಾಗಿರುವುದು ಈ ಕೊಡವ ಸಿನೆಮಾದ ದುರಂತ.

ಚಾಚರಣಿಯಂಡ ಅಪ್ಪಣ್ಣ, ಕೋಟ್ಟ್‌ಕತ್ತಿರ ಪ್ರಕಾಶ್‌, ವಾಂಚಿರ ಜಯ, ವಾಂಚಿರ ನಾಣಯ್ಯ ಮುಂತಾದವರು ಮಕ್ಕಡ ಮನಸ್ಸ್ ‌ ಸಿನೆಮಾ ಕೊಡವ ಸಿನೆಮಾ ಎಂಬುದಕ್ಕೆ ಸಾಕ್ಷಿಗಳಾಗಿದ್ದಾರೆ.

ಸಂದರ್ಭವಲ್ಲದ ಸಂದರ್ಭದಲ್ಲಿ ಕೊಡವ ಜನಪದ ಸೊಗಡನ್ನು ಅನುಉದ್ದೇಶ ಪೂರ್ವಕವಾಗಿ ತೋರಿಸುತ್ತಾ ಕೊಡವ ಸಿನಿಮಾ ಎಂದು ಒತ್ತಾಯ ಪೂರ್ವಕವಾಗಿ ನಿರ್ದೇಶಕರು ಪ್ರತಿಪಾದನೆ ಮಾಡಲು ಹೊರಟಂತಿದೆ.

ಸರಕಾರಿ ಮಾದರಿ ಶಾಲೆಗಳನ್ನು ಮತ್ತು ಕ್ರೈಸ್ತ ಶಿಕ್ಷಣ ಕೇಂದ್ರಗಳನ್ನು ಸಮೀಕರಿಸುವಲ್ಲಿ ನಿರ್ದೇಶಕರು ತುಂಬಾ ಶ್ರಮವಹಿಸಿದ್ದಾರೆ ಎಂದರೆ ಎಳ್ಳಷ್ಟು ತಪ್ಪಾಗಲಿಕ್ಕಿಲ್ಲ.

ಇಡೀ ಸಿನಿಮಾದ ಉದ್ದಕ್ಕೂ ಮಕ್ಕಳ ಮನಸ್ಸನ್ನು ಹೇಳುವ ಪ್ರಯತ್ನದೊಂದಿಗೆ ಇದು ಕೊಡವ ಸಿನಿಮಾ, ಇದೂ ಕೊಡವ ಸಿನಿಮಾ ಎಂದು ಒತ್ತಾಯ ಪೂರ್ವಕವಾಗಿ ಹೇಳ ಹೊರಟಿರುವುದು ಎಲ್ಲಾ ಪ್ರಬುದ್ದ ಸಿನಿವೀಕ್ಷರು ಗಮನಿಸಿಕೊಂಡಿದ್ದಾರೆ.

ಸರಕಾರಿ ಶಾಲೆಗಳನ್ನು ಉಳಿಸಿಕೊಳ್ಳುವ ನಿಟ್ಟಿನಲ್ಲಿ ಬಹುತೇಕರು ಶ್ರಮ ಪಡುತ್ತಿರುವ ಸಂದರ್ಭದಲ್ಲಿ. ಕ್ರೈಸ್ತ ಮಿಷನರಿಯೊಂದಿಗೆ ಸರಕಾರಿ ಶಾಲೆಗಳನ್ನು ಸಮೀಕರಿಸಿರುವುದು ಯಾವ ಪುರುಷಾರ್ಥಕ್ಕೋ ಅರ್ಥವಾಗುವುದಿಲ್ಲ.

ಜತೆ ಜತೆಯಲ್ಲಿ ಹಳ್ಳಿಗಾಡಿನ ಮಕ್ಕಳು ಶಾಲೆಗೆ ಹೋಗುವ ಕಷ್ಟಗಳನ್ನೂ ಹೇಳುವ ಪ್ರಯತ್ನ ಮಾಡುತ್ತಾ ಕನ್ನಡಕ್ಕೆ ಪ್ರಾಮುಖ್ಯತೆ ಕೊಡಬೇಕೆಂದೂ ಕ್ಷೀಣವಾಗಿ ಹೇಳುತ್ತಾರೆ.

ದೇವಯ್ಯ ಕುಟುಂಬದಲ್ಲಿ ಗಂಡು ಮಗುವನ್ನು ಕ್ರೈಸ್ತ ವಿದ್ಯಾ ಸಂಸ್ಥೆಗೆ ಸೇರಿಸಿ ಹೆಣ್ಣು ಮಗುವನ್ನು ಸರಕಾರಿ ಶಾಲೆಗೆ ಕಳುಹಿಸಿರುವುದು ಗಂಡು-ಹೆಣ್ಣಿನ ಬಗ್ಗೆ ಇರುವ ಅಸಮಾನತೆಯನ್ನೂ ಸೂಕ್ಷ್ಮವಾಗಿ ದಾಖಲೀಕರಿಸಿದ್ದಾರೆ ಎಂದು ಅನಿಸುತ್ತದೆ.

ಹೆಮ್ಮೆಯ ಕ್ರೀಡಾ ಪಟುಗಳಾದ ಅರ್ಜುನ್‌ ದೇವಯ್ಯ ಮತ್ತು ಅಶ್ವಿನಿ ನಾಚಪ್ಪರಿಂದ ಸ್ಪೂರ್ತಿಪಡೆದ ಚಿತ್ರವೆಂಬುದನ್ನು ಒತ್ತಿಹೇಳಲು ಕ್ರೈಸ್ತ ಶಾಲೆಯಲ್ಲಿ ಸ್ಪರ್ಧೆಯ ಕೊನೆಯ ಕ್ಷಣದಲ್ಲಿ ಅವಕಾಶವಂಚಿತವಾಗುವ ವಿದ್ಯಾರ್ಥಿ ಮತ್ತು ಸಿನೇಮಾದಲ್ಲಿ ರೇಸಿನಲ್ಲಿ ಮರಣದಂಡನೆಗೆ ಒಳಗಾದ ಕುದುರೆಯೊಂದು ಪ್ರವೇಶಿಸಿ ವಿದ್ಯಾರ್ಥಿಗಳಿಗೆ ಸ್ಪೂರ್ತಿ ಕೊಡುವಲ್ಲಿ ನಿಜಕ್ಕೂ ಮೋಸಮಾಡಿಲ್ಲ.

ಕುಡುಕ ತಂದೆಯಂದಿರಿಂದ ಮಕ್ಕಳ ಮನಸ್ಸು ಹೇಗೆ ಕೆಡುತ್ತದೆ ಎಂಬುದನ್ನು ಹೇಳುತಾ ತಂದೆಯರು ಮೈಪರಚಿಕೊಳ್ಳುವಂತೆ ಮಾಡಿ ಸರಿ ದಾರಿಗೆ ತರುವ ಪ್ರಯತ್ನವನ್ನೂ ಮಾಡಿದ್ದಾರೆ.

ಸರಕಾರಿ ಶಾಲೆಗಳಲ್ಲಿ ಅಡ್ಡಾಡಿದ ನಿರ್ದೇಶಕರ ಕ್ಯಾಮರಾ ಕ್ರೈಸ್ತ ಶಾಲಾ ಸಂಸ್ಥೆಯಲ್ಲಿ ಡ್ರೋನ್‌ ಕ್ಯಾಮಾರದೊಂದಿಗೆ ವೈಭವೀಕರಿಸಿ ಚಿತ್ರಿಸಿ ಸರಕಾರಿ ಶಾಲೆಗಳನ್ನು ಅಲ್ಲಿಯ ಶಿಕ್ಷಕರನ್ನು ಮೂಲೆ ಗುಂಪಾಗಿಸುವ ಪ್ರಯತ್ನ “ಮಕ್ಕಡ ಮನಸ್ಸ್‌” ಕೊಡವ ಸಿನಿಮಾದಲ್ಲಿದೆ.

ಅನವಶ್ಯಕವಾಗಿ ಎರಡು ಗಂಟೆ ಎಳೆದಿರುವ ಸಿನೆಮಾವು ಮುಗ್ದ ಮನಸ್ಸಿನ ವಿದ್ಯಾರ್ಥಿಗಳಿಗೆ ಮತ್ತು ಶಿಕ್ಷಕರುಗಳಿಗೆ ಒಳ್ಳೆಯ ಸಂದೇಶವನ್ನು ನೀಡಿದೆ ಎಂಬುದರಲ್ಲಿ ಎರಡು ಮಾತಿಲ್ಲ.

ಸಿನೆಮಾವಾಗಿ ಒಳ್ಳೆಯ ಸಂದೇಶ ಹೊತ್ತಿರುವ ಅತ್ಯುತ್ತಮ ಆರ್ಟ್‌ ಮೂವಿಯಾಗಬಲ್ಲ ಎಲ್ಲಾ ಲಕ್ಷಣಗಳಿರುವ “ಮಕ್ಕಡ ಮನಸ್ಸ್”‌, ಕೊಡವ ಸಿನೆಮಾ ಎಂದು ಬಿಂಬಿಸುವ ಓತ-ಪ್ರೇತ ತನದಲ್ಲಿ ಇದು ಸಿನೆಮಾವೊ? ಕೊಡವ ಸಿನೆಮಾವೋ? ಎಂಬ ಪ್ರಶ್ನೆಯಾಗೇ ಉಳಿದು ಕೊಳ್ಳುತ್ತದೆ.

ಲೇಖಕರು: ✍. ಅಲ್ಲಾರಂಡ ವಿಠಲ್ ನಂಜಪ್ಪ

ಹುಲಿಯ ಹೆಜ್ಜೆ ಗುರುತಿನ ಜಾಡು ಹಿಡಿದು….

ಹುಲಿಯ ಹೆಜ್ಜೆ ಗುರುತಿನ ಜಾಡು ಹಿಡಿದು….

ಜಗತ್ತಿನಲ್ಲಿ ನಿಮ್ಮ ಮೆಚ್ಚಿನ ಕಾಡು ಪ್ರಾಣಿ ಅಥವಾ ಕ್ರೂರ ಪ್ರಾಣಿ ಯಾವುದು ಎಂಬ ಪ್ರಶ್ನೆಗೆ ಹುಲಿಗೇ ಅತಿ ಹೆಚ್ಚು ಮತಗಳು ಬಿದ್ದಿವೆ. ವಿಚಿತ್ರವೆಂದರೆ ಹುಲಿಯ ಬಗ್ಗೆ ಇಷ್ಟು ಕಾಳಜಿ ವಹಿಸುವವರಿಗೆ ಹುಲಿಯ ಬಗ್ಗೆ ತಿಳಿದಿರುವುದು ತುಂಬಾ ಕಡಿಮೆ. ಪ್ರಾಕ್ತನಶಾಸ್ತ್ರಜ್ಞರಿಗೆ ಹುಲಿಯ ಪಳೆಯುಳಿಕೆಗಳು ಸಿಕ್ಕಿದ್ದು ಇದರ ಆಯಸ್ಸು ಸುಮಾರು ಇಪ್ಪತ್ತು ಲಕ್ಷ ವರ್ಷ ಹಿಂದಿನದ್ದು ಎಂದು ಕಂಡುಬಂದಿದೆ. ಅಂದರೆ ಹುಲಿಗಳು ಬಹಳ ಹಿಂದಿನಿಂದಲೂ ಭೂಮಿಯ ಮೇಲೆ ಉಳಿದುಕೊಂಡು ಬಂದಿವೆ ಎಂದಾಯ್ತು.
ಭಾರತದಲ್ಲಿ ಹುಲಿಗಳ ಸಂಖ್ಯೆ ಹೆಚ್ಚಾಗಿದ್ದು, ಅದು 2,967ಗೆ ಹೆಚ್ಚಾಗಿರುವುದು ಎಲ್ಲರಿಗೂ ಅಚ್ಚರಿ ತಂದಿತ್ತು. ಕಾಡಿನ ಸಮತೋಲನ, ಉತ್ತಮ ಮಳೆಯಾಗಲು ಹುಲಿಗಳು ಸಹ ಕಾರಣವಾಗಿದ್ದು, ಇದು ಭಾರತೀಯರೆಲ್ಲರಿಗೂ ಸಂತಸದ ಸುದ್ದಿಯಾಗಿತ್ತು. ಅಲ್ಲದೆ, ಹುಲಿಗಣತಿಯು ವಿಶ್ವದ ಬೃಹತ್ ಜೀವವೈವಿಧ್ಯ ಗಣತಿ ಎಂಬ ಹೆಗ್ಗಳಿಕೆಗೂ ಪಾತ್ರವಾಗಿತ್ತು. ಹುಲಿ ಆಹಾರ ಸರಪಳಿಯ ತುತ್ತ ತುದಿಯಲ್ಲಿರುವ ಜೀವಿ, ಒಂದು ಹುಲಿ ಕಾಡಲ್ಲಿ ಇದೆ ಎಂದರೆ ಆ ಕಾಡು ಸಂಮೃದ್ಧ ಎಂದು ಅರ್ಥ, ಸಸ್ಯಹಾರಿ ಪ್ರಾಣಿಗಳನ್ನು ನಿಯಂತ್ರಿಸಿ ಇಡೀ ಕಾಡನ್ನು ಸಮತೋಲನದಲ್ಲಿ ಇಡಬಲ್ಲದು.
ಹುಲಿ ಸಂರಕ್ಷಣೆಯ ವಿಚಾರದಲ್ಲಿ ಕಳೆದ ಕೆಲವು ವರ್ಷಗಳಿಂದ ಜಗತ್ತಿನಾದ್ಯಂತ ತೀವ್ರ ಜಾಗೃತಿ ವಹಿಸಲಾಗುತ್ತಿದೆ. ಆದರೂ, ಈ ವಿಷಯದಲ್ಲಿ ಸಕಾರಾತ್ಮಕವೆನ್ನುವಂಥ ಸುದ್ದಿಗಳೇನೂ ಹೆಚ್ಚು ಹೊರಹೊಮ್ಮುತ್ತಲೇ ಇರಲಿಲ್ಲ. ಆದರೆ ಈಗ ಹುಲಿಗಳ ಸಂಖ್ಯೆಯ ಮೇಲೆ ಹೊರಬಿದ್ದಿರುವ ಅಂಕಿ-ಅಂಶಗಳು, ಇದೆಲ್ಲ ಇಷ್ಟು ವರ್ಷಗಳ ಪ್ರಯತ್ನಗಳ ಒಟ್ಟು ಸಕಾರಾತ್ಮಕ ಫ‌ಲ ಎಂಬ ಸಂದೇಶವನ್ನು ಕಳುಹಿಸಿವೆ.
ಭಾರತದಲ್ಲಿ ಹುಲಿಗಳ ಸಂಖ್ಯೆಯಲ್ಲಿ ಶೇ. 33.2 8ರಷ್ಟು ಏರಿಕೆಯನ್ನು ಕಂಡಿದೆ ಎಂಬುದು 28 ಜುಲೈ 2019ರಂದು ಪ್ರಧಾನಿ ನರೇಂದ್ರ ಮೋದಿಯವರು ಬಿಡುಗಡೆಗೊಳಿಸಿದ ಅಖಿಲ ಭಾರತ 2018ರ ಹುಲಿ ಗಣತಿ ವರದಿಯಿಂದ ತಿಳಿದು ಬಂದಿದೆ. ‘ಹುಲಿಗಳ ಸಂಖ್ಯೆ ಎರಡು ಪಟ್ಟು ಹೆಚ್ಚಿಸುವ ನಿಟ್ಟಿನಲ್ಲಿ ಕ್ರಮಕ್ಕಾಗಿ ಒಂಬತ್ತು ವರ್ಷಗಳ ಹಿಂದೆ ಸೇಂಟ್‌ ಪೀಟರ್ಸ್‌ಬರ್ಗ್‌ನಲ್ಲಿ ನಿರ್ಧರಿಸಲಾಗಿತ್ತು. ಇದಕ್ಕಾಗಿ 2022ರ ಗಡಿ ಹಾಕಿಕೊಳ್ಳಲಾಗಿತ್ತು. ಆದರೆ, ನಾವು ಭಾರತದಲ್ಲಿ ನಾಲ್ಕು ವರ್ಷ ಮುಂಚಿತವಾಗಿಯೇ ಆ ಗುರಿಯನ್ನು ತಲುಪಿದ್ದೇವೆ’ ಎಂದು ಆ ಸಂದರ್ಭದಲ್ಲಿ ಪ್ರಧಾನಿ ಹೇಳಿದ್ದರು.
ಈ ಹಿಂದಿನ ಗಣತಿಗಳಲ್ಲಿ ಅತಿ ಹೆಚ್ಚು ಹುಲಿಗಳನ್ನು ಹೊಂದಿರುವ ರಾಜ್ಯ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದ್ದ ಕರ್ನಾಟಕ 524 ಹುಲಿಗಳನ್ನು ಹೊಂದುವ ಮೂಲಕ ಈ ಬಾರಿ ಎರಡನೇ ಸ್ಥಾನಕ್ಕಿಳಿದಿದೆ. 526 ಹುಲಿಗಳಿರುವ ಮಧ್ಯಪ್ರದೇಶ ಮೊದಲ ಸ್ಥಾನವನ್ನು ತನ್ನದಾಗಿಸಿಕೊಂಡಿದೆ ಹಾಗೂ 442 ಹುಲಿಗಳಿರುವ ಉತ್ತರಾಖಂಡ ಮೂರನೇ ಸ್ಥಾನ ಪಡೆದಿದೆ. ನಾಲ್ಕು ವರ್ಷಗಳಲ್ಲಿ 741 ಹುಲಿಗಳು ಹೆಚ್ಚಾಗಿದ್ದು, ಜಗತ್ತಿನಲ್ಲಿ ಹುಲಿ ಸಂತತಿಗೆ ಅತ್ಯಂತ ಸುರಕ್ಷಿತ ಸ್ಥಳವಾಗಿ ಭಾರತ ಹೊರಹೊಮ್ಮಿದೆ.
28 ಜುಲೈ 2019ರಂದು ಪ್ರಧಾನಿ ನರೇಂದ್ರ ಮೋದಿಯವರು ಬಿಡುಗಡೆಗೊಳಿಸಿದ ಅಂದಾಜು ನಾಲ್ಕನೇ ಸುತ್ತಿನ ಫಲಿತಾಂಶಗಳ ವರದಿಯ ಪ್ರಕಾರ ಹುಲಿಗಳ ಜನಸಂಖ್ಯೆಯಲ್ಲಿ ಶೇ. 33.28 ರಷ್ಟು ಹೆಚ್ಚಳವಾಗಿದೆ ಎಂಬುದನ್ನು ತೋರಿಸಿದೆ. 2014 ರಲ್ಲಿ 2,226 ಇದ್ದ ಹುಲಿಗಳ ಸಂಖ್ಯೆ, 2018 ರಲ್ಲಿ 2,967 ಕ್ಕೆ ಏರಿಕೆಯಾಗಿದೆ.
ಅಳಿಯುತ್ತಿರುವ ಹುಲಿಗಳನ್ನು ಸಂರಕ್ಷಿಸುವ ನಿಟ್ಟಿನಲ್ಲಿ 2010ರಲ್ಲಿ ರಷ್ಯಾದ ಸೈಂಟ್ ಪೀಟರ್ಸ್‌ಬರ್ಗ್‌ನಲ್ಲಿ ಜು.29ರಂದು ಸಮ್ಮೇಳನ ಆಯೋಜಿಸಲಾಗಿತ್ತು. ಹುಲಿಗಳ ಜನಸಂಖ್ಯೆಯನ್ನು ದ್ವಿಗುಣಗೊಳಿಸುವ ಗುರಿಯನ್ನು 2022ಕ್ಕೆ ನಿರ್ಧರಿಸಲಾಯಿತು. ಭಾರತದಲ್ಲಿ ನಾವು ಈ ಗುರಿಯನ್ನು ನಾಲ್ಕು ವರ್ಷಗಳ ಮುಂಚೆಯೇ ಪೂರ್ಣಗೊಳಿಸಿದ್ದೇವೆ ಎಂದು ತಮ್ಮ ಅಧಿಕೃತ ನಿವಾಸದಲ್ಲಿ ವರದಿಯನ್ನು ಬಿಡುಗಡೆ ಮಾಡಿ ಮೋದಿ ಹೇಳಿದ್ದರು. 2010ರ ಜು.29ರಂದೇ ಸಮ್ಮೇಳನ ನಡೆಸಿದ್ದರಿಂದ ಪ್ರತಿ ವರ್ಷ ಇದೇ ದಿನವನ್ನು “ವಿಶ್ವ ಹುಲಿದಿನ” ಎಂದು ತೀರ್ಮಾನಿಸಲಾಯಿತು.
ಹುಲಿಗಣತಿಯಂತಹ ವಿಶ್ವದ ಬೃಹತ್ ಜೀವವೈವಿಧ್ಯ ಗಣತಿ ಕೈಗೊಂಡಿದ್ದರ ಹಿಂದೆ ರೋಚಕ ಕತೆಗಳಿವೆ, ಕೇಂದ್ರ ಸರ್ಕಾರದ ಯೋಜನೆ, ಅರಣ್ಯ ಇಲಾಖೆ ಸಿಬ್ಬಂದಿಯ ಶ್ರಮ ಇದೆ. ಹುಲಿಗಳು ಇರುವ 20 ರಾಜ್ಯಗಳಲ್ಲಿ ಅರಣ್ಯ ಇಲಾಖೆಗಳ ಸುಮಾರು 44 ಸಾವಿರ ಸಿಬ್ಬಂದಿಯು ಗಣತಿಗಾಗಿ ಶ್ರಮವಹಿಸಿದೆ. 2017ರ ಸೆಪ್ಟೆಂಬರ್-ಅಕ್ಟೋಬರ್ ನಲ್ಲಿ ಗಣತಿ ಆರಂಭವಾಗಿದ್ದು, ಅಲ್ಲಿಂದ ಇಲ್ಲಿಯವರೆಗೆ ಹುಲಿಗಣತಿ ಮಾಡಿದೆ ಎಂದು ತಿಳಿದುಬಂದಿದೆ.
ನಾಲ್ಕನೇ ಹುಲಿಗಣತಿಯ ವರದಿಯಿಂದ ದೇಶದಲ್ಲಿ ಸುಮಾರು 3 ಸಾವಿರ ಹುಲಿಗಳು ಇರುವುದಾಗಿ ತಿಳಿದುಬಂದಿದೆ. ಈ ಮೂಲಕ ಜಗತ್ತಿನಲ್ಲಿ ಹುಲಿ ಸಂತತಿಗೆ ಅತ್ಯಂತ ಸುರಕ್ಷಿತ ಸ್ಥಳವಾಗಿ ಭಾರತ ಗುರುತಿಸಿಕೊಂಡಿದೆ. ಹುಲಿಗಳ ಗಣತಿಗಾಗಿ ಈ ಅರಣ್ಯ ಇಲಾಖೆ ಸಿಬ್ಬಂದಿಯು ಇಷ್ಟು ದಿನ ಅರಣ್ಯದಲ್ಲಿ ಸುಮಾರು 3.81 ಲಕ್ಷ ಚದರ ಕಿಲೋಮೀಟರ್ ಸಂಚರಿಸಿದ್ದಾರೆ. ಹುಲಿಗಳು ಅಡಗಿರುವ ಕುರಿತು ಮಾಹಿತಿ, ಅವುಗಳ ಹೆಜ್ಜೆಗುರುತು, ವಾಸಿಸುವ ಸ್ಥಳ, ಹೆಚ್ಚು ಇರುವ ಪ್ರದೇಶಗಳನ್ನು ಗುರುತಿಸಿ ಗಣತಿ ಮಾಡಿದೆ. ಇದಕ್ಕಾಗಿ 5.93 ಲಕ್ಷ ಮಾನವ ದಿನಗಳ ಶ್ರಮವನ್ನು ವ್ಯಯಿಸಲಾಗಿದೆ ಎಂದು ತಿಳಿದುಬಂದಿದೆ.
2006 ರಿಂದ ವೈಜ್ಞಾನಿಕ ರೀತಿಯಲ್ಲಿ ಹುಲಿಗಳ ಎಣಿಕೆ ಕಾರ್ಯ ನಡೆಸಲಾಗುತ್ತಿದೆ. ಪ್ರತಿ ನಾಲ್ಕು ವರ್ಷಗಳಿಗೊಮ್ಮೆ ದೇಶದಲ್ಲಿ ಹುಲಿ ಗಣತಿ ನಡೆಸಲಾಗುತ್ತಿದೆ. 2006 ರಲ್ಲಿ ದೇಶದಲ್ಲಿ 1411 ಹುಲಿಗಳು ಇರುವುದಾಗಿ ಗುರುತಿಸಲಾಗಿತ್ತು. ಪ್ರಸ್ತುತ ವರದಿಯ ಪ್ರಕಾರ, ಆ ಸಂಖ್ಯೆ ಈಗ ದ್ವಿಗುಣಗೊಂಡಿದೆ. 2006, 2010, 2014, 2018 ರಲ್ಲಿ ಗಣತಿ ನಡೆಸಲಾಗಿದೆ. ಹುಲಿ ಸಂರಕ್ಷಣೆಗೆ ಕೈಗೊಂಡಿರುವ ಕ್ರಮಗಳ ಪರಿಣಾಮ ಈ ವರದಿಯಿಂದ ತಿಳಿದುಬಂದಿದೆ. ಈ ಬಾರಿ ಗಣತಿಗೆ ಕ್ಯಾಮರಾ ಟ್ರ್ಯಾಪ್ ಗಳನ್ನು ಬಳಸಲಾಗಿತ್ತು. 2014ರಲ್ಲಿ ಇಂತಹ ಕ್ಯಾಮೆರಾಗಳ ಸಂಖ್ಯೆ 9,735 ಇತ್ತು.
ಹುಲಿಗಳ ಮೈಮೇಲಿನ ಪಟ್ಟೆಗಳು ಪ್ರತಿ ಹುಲಿಗೂ ಭಿನ್ನವಾಗಿದ್ದು, ಇದರಿಂದ ಹುಲಿಗಳನ್ನು ನಿರ್ದಿಷ್ಟವಾಗಿ ಗುರುತಿಸಬಹುದು. ಹುಲಿಯ ಹೆಜ್ಜೆ ಗುರುತಿನ ಜಾಡು ಹಿಡಿದು ಅವುಗಳ ಆವಾಸ ಸ್ಥಾನದ ವ್ಯಾಪ್ತಿ ಪತ್ತೆ ಮಾಡಲಾಯಿತು. ಹೆಜ್ಜೆಯ ಉದ್ದ-ಅಗಲವನ್ನು ಅಳತೆ ಮಾಡಲಾಯಿತು. ಈ ಸಂದರ್ಭದಲ್ಲಿ ಹುಲಿ ಗಣತಿಯೊಂದಿಗೆ ಕಾಡಿನ ಇತರೆ ಪ್ರಾಣಿಗಳಾದ ಆನೆ, ಚಿರತೆ, ಕಾಡಮ್ಮೆ, ಜಿಂಕೆ ಮುಂತಾದ ಪ್ರಾಣಿಗಳು ಗಣತಿದಾರರಿಗೆ ದರ್ಶನ ಕೊಟ್ಟವು.
ಹುಲಿ ಅಪ್ರತಿಮ ಬೇಟೆಗಾರನಲ್ಲ, ಅನೇಕ ಬಾರಿ ಪ್ರಯತ್ನಿಸಿ ಕೆಲವು ಸಲ ಮಾತ್ರ ಗೆಲ್ಲುತ್ತದೆ. ಹುಲಿಯ ಆಹಾರ ಸರಪಳಿಯಲ್ಲಿ ಮನುಷ್ಯ ಇಲ್ಲ, ಆದರೆ ಗಾಯಗೊಂಡ ಹುಲಿಗಳು, ವಯಸ್ಸಾಗಿ ಕಾಡು ಪ್ರಾಣಿಗಳನ್ನು ಬೇಟೆಯಾಡಲು ಅಸಮರ್ಥವಾದಾಗ ಸುಲಭದಲ್ಲಿ ಸಿಗುವ ಮನುಷ್ಯ, ಜಾನುವಾರುಗಳ ಮೇಲೆ ದಾಳಿ ಮಾಡುತ್ತವೆ.
ಅಭಿವೃದ್ಧಿಯ ಹೆಸರಿನಲ್ಲಿ ಮತ್ತು ಹೆಚ್ಚಿದ ಜನಸಂಖ್ಯೆ ಮತ್ತವರ ಅವಶ್ಯಕತೆಗಳಿಗಾಗಿ ಹುಲಿಯ ಆವಸವಾದ ಕಾಡುಗಳ ನಾಶ, ವಿವಿಧ ಕಾರಣಗಳಿಗಾಗಿ ಹುಲಿಯ ಮತ್ತು ಹುಲಿಯ ಬಲಿ, ಪ್ರಾಣಿಗಳ ಕಳ್ಳ ಬೇಟೆ, ಕಾಡ್ಗಿಚ್ಚು, ಹೀಗೆ ಅನೇಕ ಕಾರಣಗಳಿಂದ ಹುಲಿಗಳ ಸಂಖ್ಯೆ ಕ್ಷೀಣಿಸುತ್ತಿದೆ ಎಂಬುದಂತೂ ನಿಜ.

✍. ವಿವೇಕ್‌ ನರೇನ್

ಶ್ರೀ ದುರ್ಗಾ ಭಗವತಿ ದೇವಸ್ಥಾನ, ತಾಳತ್ತಮನೆ-Sri Durga Bhagavathy Temple,Talathamane

ಕುಂದೂರುಕೇರಿ ಶ್ರೀ ದುರ್ಗಾ ಭಗವತಿ ದೇವಸ್ಥಾನ, ತಾಳತ್ತಮನೆ

ಶ್ರೀ ದುರ್ಗಾ ಭಗವತಿ ದೇವಾಸ್ಥಾನದ ಇತಿಹಾಸ ಹಿನ್ನಲೆ :

ಅಷ್ಟಮಂಗಲ ಪ್ರಶ್ನೆಯಂತೆ ಪುರಾತನ ಕಾಲದ ಈ ಕಾಳೀ ಸ್ವರೂಪಿಣಿ ಶಕ್ತಿ ದೇವತೆಯ ವಿಶಾಲ ದೇಗುಲವು ಕಾರಾಣಾಂತರದಿಂದ ನಿತ್ಯಪೂಜೆ ತಪ್ಪುವಂತಾಗಿ; ಗ್ರಾಮಸ್ಥರ ಕಡೆಗಣನೆಯಿಂದ ಕಾಡು ಪಾಲಾಗಿತ್ತು. ಸುಮಾರು 550 ವರ್ಷಗಳಿಂದ ಸಂಪೂರ್ಣ ಕಾಡು ಪಾಲಾಗಿ ನಶಿಸಿ ಹೋಗಿತ್ತು. ಈ ದೇವಾಲಯವು ಪುರಾತನ ಕಾಲದ್ದಾಗಿದ್ದು, ಯಾವಾಗ ಸ್ಥಾಪನೆಯಾಗಿದೆ ಎಂಬ ಬಗ್ಗೆ ನಿಖರವಾದ ಮಾಹಿತಿ ಕಂಡು ಬಂದಿಲ್ಲ.
ಕಾಡು ಪಾಳಾಗಿ ಶಿಥಿಲಗೊಂಡಿದ್ದ ದೇವಾಲಯವು 2005ರಲ್ಲಿ ಪುನರ್‌ ನಿರ್ಮಾಣ ಮಾಡಲು ಸ್ಥಳೀಯ ಸಕ್ರೀಯ ಯುವ ಸಂಘಟನೆಯಾದ ನೇತಾಜಿ ಯುವಕ ಮಂಡಲವು ನಿರ್ಧರಿಸಿ. ಆರಂಭಿಕ ತಾಂಬೂಲ ಪ್ರಶ್ನಾ ಕಾರ್ಯವನ್ನು ನಡೆಸಿತು. ಈ ಸಂಬಂಧ ದೈವಜ್ಞ ರಿಂದ ಪ್ರಶ್ನೆ ಇರಿಸಿ ಮಾರ್ಗದರ್ಶನ ಪಡೆದುಕೊಂಡಿದೆ. ಅಂತೆಯೇ ಒಂದೊಮ್ಮೆ ಈ ಸ್ಥಳದಲ್ಲಿ ವಿಶಾಲ ದೇವಾಲಯ ದೊಂದಿಗೆ; ಮಹಾಕಾಳಿ ಸ್ವರೂಪಳಾದ ಶ್ರೀ ದುರ್ಗಾ ಭಗವತಿಯು ತನ್ನ ಪರಿವಾರದೊಂದಿಗೆ; ಪೂಜೆಗೊಳ್ಳುತ್ತಿದ್ದ ಐತಿಹ್ಯ ಗೋಚರಿಸಿದೆ. ಈ ದಿಸೆಯಲ್ಲಿ ಸಂಬಂಧಿಸಿದ ದೇವಾಲಯವನ್ನು ಜೀರ್ಣೋದ್ಧಾರಗೊಳಿಸಿ; ಐದು ಶತಮಾನಗಳಿಂದ ನಿರ್ಲಕ್ಷಿಸಲ್ಪಟ್ಟಿರುವ ದೇವಿಯನ್ನು ಮರಳಿ ಆರಾಧಿಸುವಂತಾದರೆ ನಾಡಿಗೆ ಸುಭಿಕ್ಷೆ ಪ್ರಾಪ್ತಿಯಾಗಲಿದೆ ಎಂಬ ಅಂಶವೂ ಕಂಡು ಬಂದಿತ್ತು.
ಈ ನಿಟ್ಟಿನಲ್ಲಿ ಗ್ರಾಮಸ್ಥರೆಲ್ಲಾ ಒಟ್ಟುಗೂಡಿ ವಿವಿಧ ಪ್ರಾಯಶ್ಚಿತ ಪೂಜಾ ಕಾರ್ಯಗಳನ್ನು ನಡೆಸಿ, ಜೀರ್ಣೊದ್ಧಾರ ಸಮಿತಿಯನ್ನು ರಚಿಸಿ ಮುಂದಿನ ಕಾರ್ಯಗಳ ಜವಾಬ್ದಾರಿಯನ್ನು ವಹಿಸಲಾಯಿತು. ಶ್ರೀ ದುರ್ಗಾ ಭಗವತಿ ದೇವಾಸ್ಥಾನದ ಜೀರ್ಣೊದ್ಧಾರ ಸಮಿತಿಯು ಅಷ್ಟಮಂಗಲ ಪ್ರಶ್ನಾ ಚಿಂತನೆಯನ್ನು 31-03-2016ರಿಂದ 02-04-2016 ರವರಗೆ ನಡೆಸಿತು. ಶ್ರೀ ಕ್ಷೇತ್ರವು ಶ್ರೀ ಮಹಾಗಣಪತಿ, ಗುಳಿಗ, ಚಾಮುಂಡಿ, ನಾಗಸನ್ನಿಧಿಗಳನ್ನೊಳಗೊಂಡ ಐದು ಸಾನಿಧ್ಯವುಳ್ಳದಾಗಿದ್ದು, ಶ್ರೀ ಕ್ಷೇತ್ರದ ಪುನರ್‌ ಪ್ರತಿಷ್ಠೆಯಾದಲ್ಲಿ ಈ ವ್ಯಾಪ್ತಿಯಷ್ಟೇ ಅಲ್ಲದೆ ಇದರ ಸುತ್ತಮುತ್ತಲಿನ ಗ್ರಾಮಗಳೂ ಕೂಡ ಸುಭೀಕ್ಷೆಯಿಂದ ಕೂಡುವುದಲ್ಲದೇ, ಶ್ರೀ ಕ್ಷೇತ್ರವು ವಿವಾಹ ಯೋಗ, ಸಂತಾನ ಪ್ತಾಪ್ತಿ ಹಾಗೂ ಶತ್ರು ಸಂಹಾರಕ್ಕೆ ಪ್ರಸಿದ್ಧಿಯನ್ನು ಪಡೆಯುವುದಾಗಿ ಚಿಂತನೆಯಲ್ಲಿ ಕಂಡು ಬಂದಿರುತ್ತದೆ. ಅಷ್ಟಮಂಗಲ ಪ್ರಶ್ನೆಯ ಸಂದೇಶದಂತೆ ತಾಳತ್‍ಮನೆ ನಿವಾಸಿಗಳು; ಪ್ರಸಕ್ತ ಜಾಗದ ಮಾಲೀಕರಾಗಿರುವ ಗೊಲ್ಲ ಸಮುದಾಯದ ಅರೆಯಂಡ ಕುಟುಂಬವನ್ನು ಮನವೊಲಿಸಿ; ಸಂಬಂಧಿಸಿದ ಸ್ಥಳದಲ್ಲಿ ನೂತನ ದೇವಾಲಯ ನಿರ್ಮಾಣಕ್ಕೆ ಸಾಮೂಹಿಕ ನಿರ್ಧಾರ ಕೈಗೊಂಡರು.
2016ನೇ ಆಗಸ್ಟ್‌ 31 ರಂದು ಅನುಜ್ಞಾಕಲಶ ಪೂಜಾ ಕಾರ್ಯದೊಂದಿಗೆ ಲಿಂಗರೂಪಿಣಿ ಶ್ರೀ ದುರ್ಗಾ ಭಗವತಿಯವರ ಮೂಲ ಪೀಠವನ್ನು ಬಾಲಾಲಯಕ್ಕೆ ಸ್ಥಳಾಂತರಿಸಿ ಇಲ್ಲಿಯವರಗೆ ತಿಂಗಳ ಮೊದಲ ಶುಕ್ರವಾರದಂದು ಪೂಜೆಯನ್ನು ಸಲ್ಲಿಸುತ್ತಾ ಬರಲಾಗಿತ್ತು. 19-03-2018 ರಂದು ದೇವಾಸ್ಥಾನದ ಶಿಲಾನ್ಯಾಸ ಕಾರ್ಯವನ್ನು ನಡೆಸಿ, ಪುನರ್‌ ನಿರ್ಮಾಣವನ್ನು ಆರಂಭಿಸಲಾಗಿತ್ತು. ದಿನಾಂಕ 09-01-2019ರಂದು ಗರ್ಭಾನ್ಯಾಸ ಕಾರ್ಯ ನಡೆದು ಶ್ರೀ ದುರ್ಗಾ ಭಗವತಿಯಮ್ಮನವರ ಗರ್ಭಗುಡಿ ಮತ್ತು ತೀರ್ಥ ಮಂಟಪದ ನಿರ್ಮಾಣಕ್ಕೆ ನಾಂದಿ ಹಾಡಲಾಯಿತು. ದಿನಾಂಕ 09-04-2019ರಂದು ಶ್ರೀ ಗಣಪತಿ ಗುಡಿ ಮತ್ತು ಸುತ್ತು ಪೌಳಿಯ ನಿರ್ಮಾಣ ಕಾರ್ಯಕ್ಕೆ ಚಾಲನೆ ನೀಡಲಾಯಿತು. ದೈವಜ್ಞರಾದ ಶ್ರೀ ಪಂಕಜಾಕ್ಷ ಮತ್ತು ಶ್ರೀ ರಾಜೇಶ ಇವರ ನೇತ್ರತ್ವದಲ್ಲಿ ಅಷ್ಟಮಂಗಲ ಪ್ರಶ್ನಾ ಚಿಂತೆನೆ ಕಾರ್ಯ ನಡೆದು, ವಾಸ್ತುಶಿಲ್ಪಿ ಬೆದರಡ್ಕ ರಮೇಶ್‌ ಕಾರಂತರು ದೇವಸ್ಥಾನದ ಪುನರ್‌ ನಿರ್ಮಾಣದ ನಕ್ಷೆಯನ್ನು ತಯಾರಿಸಿ ಶ್ರೀ ದುರ್ಗಾ ಭಗವತಿ ದೇವಾಸ್ಥಾನದ ಜೀರ್ಣೊದ್ಧಾರ ಸಮಿತಿಯವರಿಗೆ ಮಾರ್ಗದರ್ಶನ ನೀಡಿದ್ದರು.
ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಪರಮಪೂಜ್ಯ ಡಾ|| ಡಿ. ವೇರೇಂದ್ರ ಹೆಗ್ಗಡೆ ಯವರ ಶುಭಾಶೀರ್ವಾದಗಳೊಂದಿಗೆ ಬ್ರಹ್ಮಶ್ರೀ ಕುಂಟಾರು ವಾಸುದೇವ ಮತ್ತು ರವೀಶ ತಂತ್ರಿಗಳ ಪೂರ್ಣ ಮಾರ್ಗದರ್ಶನ ಹಾಗೂ ನೇತೃತ್ವದಲ್ಲಿ ಸ್ವಸ್ತಿ ಶ್ರೀ ವಿಕಾರಿ ನಾಮ ಸಂವತ್ಸರದ ಮಾಘ ಮಾಸ 24 ರಿಂದ 29 ಸಲ್ಲುವ ದಿನಾಂಕ: 07-02-2020 ರ ಶುಕ್ರವಾರದಿಂದ 12-02-2020 ರ ಬುಧವಾರದವರಗೆ ಪುನರ್‌ ಪ್ರತಿಷ್ಠೆ ಅಷ್ಟಬಂದ ಬ್ರಹ್ಮಕಲಶೋತ್ಸವ ನಡೆಯಿತು.
ಕೊಡಗು ಜಿಲ್ಲಾ ಕೇಂದ್ರ ಮಡಿಕೇರಿಯಿಂದ 3.ಕಿ.ಮೀ. ಅಂತರದ ಕುಂದೂರುಕೇರಿ (ತಾಳತ್‍ಮನೆ)ಯಲ್ಲಿ ಶ್ರೀ ದುರ್ಗಾ ಭಗವತಿ ದೇವಾಸ್ಥಾನ ನೆಲೆ ನಿಂತಿದ್ದೆ.

ಹೆಚ್ಚಿನ ಮಾಹಿತಿಗಾಗಿ ಸಂಪರ್ಕಿಸಿರಿ

ಶ್ರೀ ಚೆಟ್ಟೋಳಿರ ಅಪ್ಪಯ್ಯ: 9449476138

ಶ್ರೀ ಅರೆಯಂಡ ರಘು: 9480220003

ಶ್ರೀ ಚೆರಿಯಮನೆ ರಾಜಕುಮಾರ್:‌ 9448315457

ಶ್ರೀ ಬಿ.ಕೆ. ರವಿ: 9448303653

ಶ್ರೀ ಬಿ.ಬಿ. ಸುದೀಪ್‌ ರೈ: 9449634679

ಶ್ರೀ ಗಿರೀಶ್‌ ತಾಳತ್ತಮನೆ: 9449933457

ಶ್ರೀ ಬಿ. ಸತ್ಯೇಶ್‌ ಭಟ್:‌ 9448648505

ದೇವಾಲಯದ ಬ್ಯಾಂಕ್‌ ಖಾತೆ ವಿವರಗಳು

ಸುಮಾರು 70ಲಕ್ಷ ಅಂದಾಜು ವೆಚ್ಚದೊಂದಿಗೆ ಶ್ರೀ ದುರ್ಗಾ ಭಗವತಿ ದೇವಾಸ್ಥಾನ ಪುನರ್‌ ನಿರ್ಮಾಣಗೊಂಡಿದ್ದು, ಮುಂದಿನ ದೇವಾಲಯದ ಅಭಿವೃದ್ಧಿ ಕಾರ್ಯಗಳಿಗೆ ಭಕ್ತಾದಿಗಳು ತನು, ಮನ, ಧನಗಳಿಂದ ಸಹಕಾರ ನೀಡುವವರು ದೇವಾಲಯದ ಈ ಮುಂದಿನ ಬ್ಯಾಂಕ್‌ ಖಾತೆಗೆ ನೀಡಿ ಶ್ರೀ ದೇವಿಯ ಕೃಪೆಗೆ ಪಾತ್ರರಾಗ ಬೇಕಾಗಿ ಈ ಮೂಲಕ ಶ್ರೀ ದುರ್ಗಾ ಭಗವತಿ ದೇವಾಸ್ಥಾನದ  ಸಮಿತಿಯು ಕೊರುತ್ತದೆ.

ವಿಜಯ ಬ್ಯಾಂಕ್‌, ಮಡಿಕೇರಿ.

Vijaya Bank, Main Road, Madikeri.

A/C. No:  114701011000990

IFSC Code: VIJB0001147

Sri Durga Bhgavathi Temple Cmmittee, Talathmane.

ಸೂರ್ಯನ ಜನ್ಮದಿನ “ರಥಸಪ್ತಮಿ”

ಸೂರ್ಯನ ಜನ್ಮದಿನ “ರಥಸಪ್ತಮಿ”

ಸೂರ್ಯನಿಲ್ಲದೆ ನಮ್ಮ ಬದುಕಿಲ್ಲ. ಸೃಷ್ಟಿಯಲ್ಲಿರುವ ಎಲ್ಲ ಜೀವಿಗಳ ಅಳಿವು–ಉಳಿವು ಸೂರ್ಯನನ್ನೇ ಆಶ್ರಯಿಸಿದೆ ಎಂದರೆ ಅದೇನೂ ತಪ್ಪಾಗದು. ಹೀಗಾಗಿ ಅವನು ನಮ್ಮ ಪಾಲಿಗೆ ದೇವರೇ ಆಗಿದ್ದಾನೆ. ಇದು ಭೌತಿಕ ಸೂರ್ಯನ ವಿಷಯವಾಯಿತು. ಸೂರ್ಯಾರಾಧನೆಗೆ ಇನ್ನೊಂದು ಆಯಾಮವೂ ಉಂಟು. ಜಗತ್ತಿನ ಮುಂದುವರಿಕೆಗೆ ಚಾಲಕನಾದ ಶ್ರೀ ಸೂರ್ಯ ಭಗವಾನನು ಸಿಂಹ ರಾಶಿಯಿಂದ ಮಕರ ರಾಶಿಗೆ ತನ್ನ ರಥವನ್ನೇರಿ ಹೋಗುತ್ತಾನೆ. ಅಂದರೆ ಇಂದಿಗೆ ಚಳಿಗಾಲವು ಮುಗಿದು ಬೇಸಿಗೆಯ ಕಾಲವು ಪ್ರಾರಂಭವಾಗುವುದು. ಸೂರ್ಯನು ತನ್ನ ಏಳು ಕುದುರೆಗಳ ರಥವನ್ನೇರುವನು. ಅವನ ರಥದ ಸಾರಥಿ ಅರುಣ.
ಒಂದೊಂದು ಹಬ್ಬಕ್ಕೂ ಒಂದೊಂದು ಮಹತ್ವ. ಅಂತೆಯೇ ರಥಸಪ್ತಮಿಗೂ ಒಂದು ವಿಶೇಷ ಮಹಿಮೆ ಇದೆ. ‘ರಥಸಪ್ತಮಿ’ ಎಂದರೆ ಸೂರ್ಯ ದೇವನು ಚಾಂದ್ರಮಾನ ಸಂವತ್ಸರದ ಹನ್ನೊಂದನೇ ಮಾಸದ ಅಂದರೆ ಮಾಘ ಶುಕ್ಲ ಪಕ್ಷದ ಸಪ್ತಮಿ ತಿಥಿ ದಿವಸ ಸಪ್ತಾಶ್ವಗಳಿಂದ ಕೂಡಿದ ರಥವನ್ನೇರುವ ದಿವಸ. ಅಂದಿನಿಂದ ಅಶ್ವಾರೂಢನಾಗಿ ಪ್ರಖರವಾಗಲು ಆರಂಭಿಸುವ ದಿನ. ಇದಕ್ಕೆ ‘ಮಾಘ ಸಪ್ತಮಿ’ ಎಂತಲೂ ಕರೆಯುತ್ತಾರೆ. ಮಕರ ರಾಶಿ ಪ್ರವೇಶಿಸಿದ ಸೂರ್ಯನು, ಅಂದು ಸಪ್ತಾಶ್ವರಥಾರೋಹಣ ಮಾಡಿದ ಸಂಕೇತವಾಗಿ ‘ರಥಸಪ್ತಮಿ ವ್ರತಾಚರಣೆ’ ಸಂಪ್ರದಾಯ ಬೆಳೆದು ಬಂದಿದೆ. ಅಂದಿನಿಂದ ಸೂರ್ಯನ ಪ್ರಖರವಾದ ಕಿರಣಗಳು ಇಡೀ ಜಗತ್ತಿನಲ್ಲಿ ಪಸರಿಸಲು ಆರಂಭಿಸುತ್ತವೆ.
ಸೂರ್ಯನ ಆರಾಧನೆಗೆ ಸಪ್ತಮಿ ತಿಥಿ ಮತ್ತು ಆದಿತ್ಯವಾರ ಶ್ರೇಷ್ಠ. ‘ಸಪ್ತ ಜನ್ಮನಿ ಕೃತೇ ಪಾಪಂ ಮುಕ್ತಿರ್ಭವತಿ ತತ್‌ ಕ್ಷಣಾತ್‌’ ಎಂಬಂತೆ ಗಂಗಾನದಿಯಲ್ಲಿ ಸ್ನಾನ ಮಾಡಿ ಶುದ್ಧವಾದಂತೆ ಸಪ್ತಮಿ ತಿಥಿಯಂದು ಸೂರ್ಯನನ್ನು ಪೂಜಿಸಿದರೆ ಏಳು ಜನ್ಮದಲ್ಲಿ ಮಾಡಿದ ಪಾಪಗಳು ಕ್ಷಯವಾಗಿ ಆಯುಷ್ಯ, ಆರೋಗ್ಯ, ಸಂಪತ್ತು ಲಭಿಸುತ್ತದೆ ಎಂದು ಪೌರಾಣಿಕದ ಒಂದು ಕಥೆ ತಿಳಿಸುತ್ತದೆ. ಸೂರ್ಯನ ರಥಕ್ಕೆ ಏಳು ಕುದುರೆಗಳು. ಅವುಗಳ ಹೆಸರುಗಳು ಗಾಯತ್ರಿ, ಬೃಹತೀ, ಉಷ್ಣಿಕ್, ಜಗತೀ, ತ್ರಿಷ್ಟುಪ್, ಅನುಷ್ಟುಪ್ ಮತ್ತು ಪಂಕ್ತಿ.
ಮಾಘಮಾಸ ಶುಕ್ಲ ಪಕ್ಷದ ಸಪ್ತಮಿ ತಿಥಿಯಂದು ಸೂರ್ಯನ ಜನ್ಮದಿನ ಅಲ್ಲದೆ ಸಪ್ತಮಿ ತಿಥಿಯ ಅದಿದೇವತೆಯು ಸೂರ್ಯನೇ ಆಗಿರುವುದರಿಂದ ಇದೇ 2020ರ ಫೆಬ್ರವರಿ 1ರ ಶನಿವಾರದಂದು ಸೂರ್ಯ ಆರಾಧನೆಯ ರಥ ಸಪ್ತಮಿ ದಿನವೆಂದು ಆಚರಿಸಲಾಗುತ್ತದೆ. ಸೂರ್ಯನ ಪೂಜೆಯೇ ಈ ದಿವಸದ ಮುಖ್ಯ ಆಚರಣೆ ಈ ದಿನದಲ್ಲಿ ನಡೆಯುವ ಕೆಲಸ ಕಾರ್ಯಗಳು, ಕೋರಿಕೆಗಳು ಫಲಪ್ರದವಾಗಿರುತ್ತವೆ.
ಭಾರತೀಯ ಸಂಸ್ಕೃತಿಯ ಪರಂಪರೆಯಲ್ಲಿ ಸರ್ವ ದೇವ-ದೇವತೆಯರಿಗೂ ಸಮಾನ ಪೂಜೆ ಪುನಸ್ಕಾರ ಮತ್ತು ಒಬ್ಬೊಬ್ಬ ದೇವರಿಗೆ ಒಂದೊಂದು ಮಹತ್ವವಿದೆ. ನಮ್ಮ ನಿತ್ಯ ಜೀವನದಲ್ಲಿ ಸಹ ಒಂದೊಂದು ಕಾರ್ಯಕ್ಕೆ ಒಬ್ಬ ಮುಖ್ಯಸ್ಥನಿರುವಂತೆ ದೇವತೆಗಳಲ್ಲಿ ಸಹ ಮುಖ್ಯಸ್ಥರಿದ್ದಾರೆ. ಉದಾಹರಣೆಗೆ: ವಿಘ್ನ ನಿವಾರಣೆಗೆ ಗಣೇಶ, ವಿದ್ಯಾರ್ಜನೆಗೆ ಸರಸ್ವತಿ, ಲಕ್ಷ್ಮೀ ಪ್ರಾಪ್ತಿಗಾಗಿ (ಧನ ಸಂಪಾದನೆಗೆ) ಮಹಾಲಕ್ಷ್ಮೀ, ಮಳೆ ಪಡೆಯಲು ವರುಣ ದೇವ ಇತ್ಯಾದಿ. ಅದರಂತೆ ‘ಆರೋಗ್ಯ ಭಾಗ್ಯ’ಕ್ಕಾಗಿ ಮುಖ್ಯ ದೇವರೆಂದರೆ ಸೂರ್ಯ ಹಾಗಾಗಿ ಸೂರ್ಯನ ಜನ್ಮದಿನವನಾಗಿ “ರಥಸಪ್ತಮಿ” ಆಚರಣೆ.
ಸೂರ್ಯ ಆರೋಗ್ಯಕಾರಕ ಮತ್ತು ಜ್ಞಾನಕಾರಕ. ಹೀಗಾಗಿ ನಮ್ಮ ಆರೋಗ್ಯವೂ ಬುದ್ಧಿಯೂ ಜೀವನಕ್ಕೆ ಪೋಷಕವಾಗಲು ಸೂರ್ಯನ ಆರಾಧನೆ ಸಹಕಾರಿ ಎನ್ನುವುದು ನಮ್ಮ ಪರಂಪರೆಯಲ್ಲಿರುವ ನಂಬಿಕೆ. ನಮ್ಮ ದೇಹ–ಮನಸ್ಸುಗಳ ಸ್ವಾಸ್ಥ್ಯವನ್ನು ಕಾಪಾಡಿಕೊಳ್ಳಲು ಸಾಧನೆ ಬೇಕು ಎನ್ನುವುದನ್ನು ರಥಸಪ್ತಮಿಯ ಆಚರಣೆ ಎತ್ತಿತೋರಿಸುತ್ತದೆ.
ಪ್ರಕೃತಿಯು ಕಾಲಕಾಲಕ್ಕೆ ತನ್ನನ್ನು ಪರಿವರ್ತಿಸಿಕೊಳ್ಳುತ್ತದೆ. ಅದಕ್ಕೆ ಅನುಗುಣವಾಗಿ ಭಾರತೀಯರು ಕಾಲವನ್ನು ಲೆಕ್ಕಾಚಾರವಾಗಿ ಪರಿಗಣಿಸಿದ್ದಾರೆ. ಗಿಡಮರಗಳು ಹಳೆಯ ಎಲೆಗಳನ್ನು ಕೊಡವಿ, ಹೊಸ ಚಿಗುರನ್ನು ಗರಿಗೆದರಿಸಿಕೊಂಡು ಹಚ್ಚಹಸಿರಿನಿಂದ ನಳನಳಿಸುತ್ತದೆ. ಇದನ್ನು ಕಂಡ ಭಾರತೀಯರು ಈ ಎರಡು ತಿಂಗಳಿನ ಕಾಲದ ಅವಧಿಯನ್ನು ಗುರುತಿಸಿ ವಸಂತ ಋುತು ಎಂಬುದಾಗಿ ಕರೆದರು. ಮತ್ತು ಈ ಋುತುವಿನ ಆರಂಭ ಕಾಲವನ್ನು ಯುಗಾದಿ ಎಂದು ಕರೆಯಲಾಯಿತು. ಯಾವಾಗ ಮರಗಿಡಗಳು ತನ್ನಲ್ಲಿರುವ ಹಳತನ್ನು ಕಳಚಿಕೊಳ್ಳಲು ಆರಂಭ ಮಾಡುವುದೋ ಆ ಕಾಲವನ್ನು ಶಿಶಿರ ಎಂಬುದಾಗಿ ಗುರುತಿಸಲಾಯಿತು. ನಿಸರ್ಗ ನಿಯಮವನ್ನು ಅನುಸರಿಸಿ ಕಾಲದಲ್ಲಿ ಪರಿವರ್ತನೆ ಉಂಟಾಗುವುದು. ಒಂದು ಘಟ್ಟದಿಂದ ಇನ್ನೊಂದು ಘಟ್ಟಕ್ಕೆ ಉಂಟಾಗುವ ಸಂಧಿಕಾಲವನ್ನು ‘ಪರ್ವ’ ಎಂದು ಕರೆದರು. ಒಂದು ವರ್ಷ, ಹನ್ನೆರಡು ತಿಂಗಳು, ಎರಡು ಅಯನಗಳು, ಪಕ್ಷಗಳು, ತಿಥಿ, ವಾರ, ನಕ್ಷತ್ರ, ಯೋಗ, ಕರಣ ಇತ್ಯಾದಿಗಳು ಕಾಲವನ್ನು ಅಳೆಯಲು ಮಾನವಾಗಿವೆ. ಇವೆಲ್ಲವೂ ಪ್ರಕೃತಿಯಲ್ಲಿ ಉಂಟಾಗುವ ಪರಿವರ್ತನೆಯನ್ನು ಅವಲಂಬಿಸಿಯೇ ಬಂದದ್ದು.
ದ್ವಾಪರ ಯುಗದಲ್ಲಿ ಶ್ರೀ ಕೃಷ್ಣನು ಧರ್ಮರಾಜನಿಗೆ ರಥಸಪ್ತಮಿ ಬಗ್ಗೆ ಹೇಳಿದ ಕಥೆಯಿದೆ. ಯಶೋವರ್ಮನೆಂಬ ರಾಜನಿಗೆ ಹುಟ್ಟಿದ ಮಗನಿಗೆ ಹುಟ್ಟಿನಿಂದಲೇ ರೋಗಿಷ್ಠನಾಗಿದ್ದ. ಈ ಬಗ್ಗೆ ಜ್ಯೋತಿಷಿಗಳಿಂದ ಮಾಹಿತಿ ಪಡೆದು ಸಂಚಿತ ಕರ್ಮದಿಂದ ಬಂದಿರುವ ಕಾಯಿಲೆಗೆ ರಥಸಪ್ತಮಿ ವ್ರತ ಚರಿಸಲು ಹೇಳಿದ್ದರು. ಅದರಂತೆ ಅಂದು ಸೂರ್ಯಾರಾಧನೆ ಮಾಡಲಾಗಿ ರಾಜ ಪುತ್ರನು ಆರೋಗ್ಯವಂತನೂ, ಪ್ರಭಾವಶಾಲಿಯೂ ಆದನು. ಅಲ್ಲದೆ ಪಾಂಡವರು ವನವಾಸದ ಅವಧಿಯಲ್ಲಿ ಶ್ರೀಕೃಷ್ಣನ ಆದೇಶದಂತೆ ಸೂರ್ಯಾರಾಧನೆ ಮಾಡಿ ಆತನಿಂದ ಅಕ್ಷಯ ಪಾತ್ರೆ ಪಡೆದಿದ್ದರು.
ಭೌಗೋಳಿಕವಾಗಿಯೂ ಸುಮಾರು 15 ದಿವಸಗಳ ಹಿಂದೆಯೇ ಸೂರ್ಯನು ಮಕರ ರಾಶಿಗೆ ಪ್ರವೇಶಿಸುವುದರಿಂದ ‘ಮಕರ ಸಂಕ್ರಮಣ’ವೆಂದು ಕರೆದು, ಎಳ್ಳು-ಬೆಲ್ಲದೊಂದಿಗೆ ಹಬ್ಬ ಆಚರಿಸುತ್ತೇವೆ. ಅಂದರೆ, ಸೂರ್ಯನು ದಕ್ಷಿಣ ಧ್ರುವದ ಪ್ರವಾಸ ಮುಗಿಸಿ ಉತ್ತರ ಧ್ರುವದ ಕಡೆಗೆ ಕೆಳಗಿನಿಂದ ಮೇಲೇರುತ್ತಾನೆ. ಆದ್ದರಿಂದ ಬಿಸಿಲಿನ ಪ್ರಖರತೆ ಸಹ ಕ್ರಮೇಣ ವೃದ್ಧಿಸಿ, ಉತ್ತರಾಯಣ ಆರಂಭದ ಮುನ್ಸೂಚನೆ ಕೊಡುತ್ತಾನೆ. ‘ಸೂರ್ಯ ಪ್ರತ್ಯಕ್ಷ ದೇವತಾ’ ನಮ್ಮ ಕಣ್ಣಿಗೆ ಕಾಣಿಸುವ ದೇವರೆಂದರೆ ಸೂರ್ಯ ಚಂದ್ರರಿಬ್ಬರೇ. ಪ್ರತ್ಯಕ್ಷ ಕಾಣುವ ದೇವರನ್ನು ಪೂಜಿಸಬೇಕು. ಸೂರ್ಯೋಪಾಸನೆಯಿಂದಲೇ ಶ್ರೀ ಯೋಗೀಶ್ವರ ಯಾಜ್ಞವಲ್ಕ್ಯ ಮಹರ್ಷಿಗಳು ಶುಕ್ಲ ಯಜುರ್ವೇದವನ್ನು ಸಂಪಾದಿಸಿದರು. ನಿತ್ಯ ಸೂರ್ಯೋಪಾಸನೆ, ಸೂರ್ಯ ನಮಸ್ಕಾರದೊಂದಿಗೆ ಸೂರ್ಯನ ದ್ವಾದಶ ನಾಮಸ್ಮರಣ ಮಾಡಿದರೆ ಸರ್ವರೋಗ ಪರಿಹಾರವಾಗುವುವು.
ಇಡಿಯ ಸೃಷ್ಟಿಯೇ ಪರಮಾತ್ಮನ ಅಧೀನ. ಈ ಪರಮಾತ್ಮನು ಪರಂಜ್ಯೋತಿಯೂ ಹೌದು. ಅವನ ಪ್ರತೀಕವೇ ಸೂರ್ಯ. ಹೀಗಾಗಿ ಭಗವಂತನ ಆರಾಧನೆಯಲ್ಲಿ ನಮ್ಮ ಋಷಿಗಳು ಸೂರ್ಯೋಪಾಸನೆಗೆ ತುಂಬ ಮಹತ್ವವನ್ನು ಕೊಟ್ಟರು ಎನಿಸುತ್ತದೆ. ಸೂರ್ಯನಾರಾಯಣ – ಎಂದೇ ಅವನನ್ನು ಪೂಜಿಸಲಾಗುತ್ತದೆ.
ರಥ ಸಪ್ತಮಿ ದಿವಸ ರೋಗ ನಿವಾರಣೆಯನ್ನು, ದೇಹದಾರ್ಡ್ಯ ಹಾಗೂ ಆರೋಗ್ಯವನ್ನು ಬಯಸುವವರು ಸೂರ್ಯನ ಆರಾಧನೆ ಮಾಡಬೇಕೆಂಬ ನಿಯಮವಿದೆ. ರೋಗಾಣುಗಳನ್ನು ನಾಶ ಪಡಿಸುವ ಶಕ್ತಿ ಸೂರ್ಯನ ಕಿರಣಗಳಲ್ಲಿವೆ. ಬೆಳಗಿನ ಹಾಗೂ ಸಂಜೆಯ ಸೂರ್ಯ ಕಿರಣಗಳಿಂದ ಆರೋಗ್ಯ ವರ್ಧನೆಯಾಗುತ್ತದೆ. ರೋಗದಿಂದ ನರಳುವವರು ಈ ದಿವಸ ಸೂರ್ಯಾರಾಧನೆಯನ್ನು ಮಾಡಿದರೆ ಬೇಗ ಗುಣಹೊಂದುತ್ತಾರೆ. ಸೂರ್ಯ ನಮ್ಮ ಕಣ್ಣಿಗೆ ಕಾಣುವ ಪ್ರತ್ಯಕ್ಷ ದೇವರು. ಸೂರ್ಯದೇವನನ್ನು ಆರಾಧಿಸುವ ಪ್ರಮುಖ ಪರ್ವ ದಿನವೇ ರಥಸಪ್ತಮಿ.